മലയാളികൾക്ക് ഒഴിച്ചു കൂടാനാകാത്ത കിഴങ്ങുവർഗങ്ങളിലൊന്നാണ് ഉരുളക്കിഴങ്ങ്. ഉരുളക്കിഴങ്ങ് ഉപയോഗിച്ച് പല വിധത്തിലുള്ള വിഭവങ്ങൾ അടുക്കളകളിൽ സ്ഥാനം പിടിച്ചിട്ടുണ്ട്. ഉരുളക്കിഴങ്ങ് തോരൻ, ഉരുളക്കിഴക്ക് വറുത്തത്, ഉരുളക്കിഴങ്ങ് കറി തുടങ്ങി നിരവധി വിഭവങ്ങൾ നമ്മിൽ പലർക്കും പ്രിയമാണ്. പുഴുങ്ങിയ ഉരുളക്കിഴങ്ങ് അൽപം ഉപ്പ് കൂട്ടി വെറുതെ കഴിക്കാൻ പോലും സ്വാദിഷ്ടമാണ്. ചിലർ തൊലി കളയാതെ വെള്ളത്തിലിട്ടു പുഴുങ്ങിയെടുക്കുമ്പോൾ മറ്റു ചിലർ കഷ്ണങ്ങളായി മുറിച്ചാണ് ഉരുളക്കിഴങ്ങ് പുഴുങ്ങിയെടുക്കാറുള്ളത്. ഇതിൽ തന്നെ ഇത് പുഴുങ്ങുന്ന സമയത്ത് അൽപം വിനാഗിരി കൂടി ചേർത്ത് പുഴുങ്ങുന്നവരും നമുക്കിടയിലുണ്ടാകും. എന്നാൽ എന്തിനായിരിക്കും വിനാഗിരി ചേർത്ത് ഉരുളക്കിഴങ്ങ് പുഴുങ്ങുന്നത്? അറിയാം..
ധാരാളം അന്നജം അടങ്ങിയ ഉരുളക്കിഴങ്ങും കുറഞ്ഞ അളവിൽ അന്നജം അടങ്ങിയ ഉരുളക്കിഴങ്ങും വിപണിയിൽ സുലഭമാണ്. അന്നജം ധാരാളം അടങ്ങിയ ഉരുളക്കിഴങ്ങാണ് വേവിച്ചതിനു ശേഷം പൊടിച്ച് കട്ലേറ്റുകൾ പോലുള്ള വിഭവങ്ങൾ തയ്യാറാനും സൂപ്പ് പോലുള്ളവ തയ്യാറാക്കാനും നല്ലത്. ഉരുളക്കിഴങ്ങ് തൊലികളഞ്ഞ് മൊത്തമായി പുഴുങ്ങിയെടുക്കുമ്പോഴാണ് അധികം ആളുകളും വിനാഗിരി ചേർക്കുന്നത്. ഉരുളക്കിഴങ്ങ് വെന്തുപാകമായി കഴിയുമ്പോൾ അമിതമായി വെന്തുടയാതിരിക്കാനാണ് വിനാഗിരി ചേർക്കുന്നത്. ഇങ്ങനെ ചേർക്കുമ്പോൾ പുഴുങ്ങാൻ വച്ച രൂപത്തിൽ തന്നെ ഉരുളക്കിഴങ്ങ് വേവിച്ച ശേഷവും ലഭിക്കുന്നു.
