ന്യൂഡൽഹി: രാജ്യതലസ്ഥാനത്ത് മൂടൽമഞ്ഞ് തുടരുമെന്ന് റിപ്പോർട്ട്. ഡൽഹി ഇന്ദിരാഗാന്ധി അന്താരാഷ്‌ട്ര വിമാനത്താവളത്തിൽ നിന്ന് പുറപ്പെടേണ്ട 30 വിമാനങ്ങളാണ് നിലവിൽ വൈകിയിരിക്കുന്നത്. ഇവ കൂടാതെ 17 വിമാനസർവ്വീസുകൾ പൂർണ്ണമായും റദ്ദാക്കി. ഡൽഹിയിൽ നിലവിൽ 5 ഡിഗ്രി സെൽഷ്യസാണ് കുറഞ്ഞ താപനില.
കനത്ത മൂടൽമഞ്ഞ് മൂലം വിമാനങ്ങൾക്ക് സർവ്വീസ് നടത്താൻ കഴിയാതെ വന്നതോടെ എയർപോർട്ടിനകത്ത് യാത്രക്കാർ തടിച്ചുകൂടി. ലഗേജുകളുമായി മണിക്കൂറുകളോളമാണ് യാത്രക്കാർ കഴിച്ചുകൂട്ടുന്നത്. 13-20 മണിക്കൂറോളം വിമാനസർവ്വീസ് വൈകുന്നതിനാൽ വിമാനത്താവളത്തിൽ തന്നെ കഴിയേണ്ട അവസ്ഥയാണ്. മൂടൽമഞ്ഞിനെ തുടർന്ന് ദൃശ്യപരത കുറയുന്നതിനാലാണ് വിമാനങ്ങൾക്ക് സർവ്വീസ് നടത്താൻ സാധിക്കാത്തത്. സമാനകാരണത്താൽ ഡൽഹിയിൽ നിന്നുള്ള 30 ട്രെയിനുകളും വൈകിയിരിക്കുകയാണ്.
കാലാവസ്ഥ മോശമായത് മൂലം വിമാനങ്ങൾ വൈകുന്നതിന് പിന്നാലെ യാത്രക്കാർ പ്രകോപിതരാകുന്ന ദൃശ്യങ്ങളും പ്രചരിക്കുന്നുണ്ട്. കാത്തിരുന്ന് മുഷിയുന്ന യാത്രക്കാർ വിമാനജീവനക്കാർക്ക് നേരെ കയർക്കുന്ന ദൃശ്യങ്ങളാണ് പുറത്തുവരുന്നത്. വിമാനം വൈകുമെന്ന് അറിയിപ്പ് നടത്തിയ പൈലറ്റിനെ യാത്രക്കാരൻ മർദ്ദിച്ചത് ഇന്നലെയായിരുന്നു. ലോകത്തിന്റെ പല ഭാഗങ്ങളിൽ നിന്ന് ഡൽഹിയിലേക്ക് പുറപ്പെടേണ്ട വിമാനങ്ങളും കാലാവസ്ഥ പ്രതികൂലമായതിനാൽ വൈകുകയാണ്.
