ഹൈരാബാദ്: ലോകാരോഗ്യ സംഘടനയുടെ മരുന്നുകളുടെ അടിയന്തര ഉപയോഗ ലിസ്റ്റിൽ ഇടംപിടിച്ച് ഇന്ത്യയുടെ കോവിഡ്-19 വാക്സിനായ കോർബെവാക്സ് വാക്സിൻ. ഇന്ത്യൻ ഫാർമസ്യൂട്ടിക്കൽ സ്ഥാപനമായ ബയോളജിക്കൽ ഇ- ലിമിറ്റഡാണ് കോർബെവാക്സ് വാക്സിൻ ഉത്പാദിപ്പിക്കുന്നത്. ലോകാരോഗ്യ സംഘടനയുടെ എമർജൻസി യൂസിൽ കോർബെവാക്സ് വാക്സിന് ഇടംപിടിക്കാൻ സാധിച്ചതിന്റെ സന്തോഷം പങ്കുവച്ച് ബയോളജിക്കൽ ഇ- ലിമിറ്റഡ് രംഗത്തെത്തി.
” ലോകാരോഗ്യ സംഘടനയുടെ എമർജൻസി യൂസ് ലിസ്റ്റിൽ കോർബെവാക്സ് വാക്സിന് ഇടംപിടിക്കാൻ സാധിച്ചതിൽ ഞങ്ങൾ സന്തുഷ്ടരാണ്. പൊതുജനങ്ങളുടെ ആരോഗ്യം കണക്കിലെടുത്താണ് ഇത് നിർമ്മിക്കുന്നത്. ലോകാരോഗ്യ സംഘടനയുടെ ഈ അംഗികാരം കോവിഡ്-19 നെതിരായ ഞങ്ങളുടെ പോരാട്ടത്തെ ശക്തിപ്പെടുത്തും”- ബയോളജിക്കൽ ലിമിറ്റഡ് മാനേജിംഗ് ഡയറക്ടർ പറഞ്ഞു.
2021 ഡിസംബർ മുതലാണ് മുതിർന്നവർക്കും കൗമാരപ്രായക്കാർക്കും അടിയന്തര ഘട്ടങ്ങളിൽ നിയന്ത്രിത ഉപയോഗത്തിനായി കോർബെവാക്സ് വാക്സിന് ഡ്രഗ്സ് കൺട്രോൾ ഓഫ് ഇന്ത്യ അംഗീകാരം നൽകിയത്. 2022 ജൂണിൽ 18 വയസിന് മുകളിലുള്ളവർക്ക് ഇന്ത്യയിലെ ആദ്യത്തെ ഹെറ്ററോളജിക്കൽ കോവിഡ്-19 ബൂസ്റ്റർ ഡോസായി ഉപയോഗിക്കാനുള്ള അനുമതിയും കോർബെവാക്സ് വാക്സിന് ലഭിച്ചിരുന്നു.
