തൃശൂർ: സുരേഷ് ഗോപിയുടെ മകൾ ഭാഗ്യയുടെ വിവാഹം വൻ ആഘോഷമാക്കാനൊരുങ്ങി താരങ്ങൾ. നിരവധി താരങ്ങളാണ് വിവാഹത്തിൽ പങ്കെടുക്കുന്നതിനായി ഗുരുവായൂരിലെത്തുന്നത്. പ്രധാനമന്ത്രി നരേന്ദ്രമോദി ഗുരുവായൂർ ക്ഷേത്ര ദർശനത്തോടൊപ്പം വിവാഹത്തിൽ നേരിട്ടെത്തി നവ ദമ്പതികളെ അനുഗ്രഹിക്കും.
പ്രധാനമന്ത്രിയുടെ ഗുരുവായൂർ, തൃപ്രയാർ സന്ദർശനങ്ങളുടെ ഒരുക്കങ്ങൾ പൂർത്തിയാക്കിയിട്ടുണ്ട്. രാവിലെ 6. 45- ഓടെയാണ് പ്രധാനമന്ത്രി ശ്രീകൃഷ്ണ കോളേജ് ഹെലിപാടിലെത്തുന്നത്. തുടർന്ന് റോഡ് മാർഗം ഗുരുവായൂരിൽ ദർശനം നടത്തുകയും 8. 45-ഓടെ സുരേഷ് ഗോപിയുടെ മകളുടെ വിവാഹത്തിൽ പങ്കെടുക്കുകയും ചെയ്യും. 10 മണിക്കാണ് പ്രധാനമന്ത്രി തൃപ്രയാർ രാമക്ഷേത്രത്തിൽ ദർശനം നടത്തുന്നത്. ശേഷം 11 മണിക്ക് തിരികെ കൊച്ചിയിലേക്ക് തിരിക്കും.
സുരേഷ് ഗോപിയുടെ മകളുടെ വിവാഹത്തിൽ പങ്കെടുക്കാൻ നിരവധി താരങ്ങൾ എത്തുമെന്നാണ് വിവരം. കഴിഞ്ഞ ദിവസം മമ്മൂട്ടിയും മോഹൻലാലും വിവാഹത്തിന് മുന്നോടിയായി നടന്ന ആഘോഷ പരിപാടിയിൽ പങ്കെടുത്തിരുന്നു. കുഞ്ചാക്കോ ബോബൻ, ദുൽഖർ സൽമാൻ, ടൊവിനോ തോമസ് എന്നിവരും വിവാഹത്തിൽ പങ്കെടുക്കാൻ ഗുരുവായൂരിൽ എത്തുമെന്നാണ് വിവരം. 19-ന് സിനിമാ താരങ്ങൾക്കും രാഷ്ട്രീയ പ്രമുഖർക്കുമായി കൊച്ചിയിലും തിരുവനന്തപുരത്തും പ്രത്യേക വിരുന്ന് സൽക്കാരവും ഒരുക്കിയിട്ടുണ്ട്.
