ഹൈദരാബാദ്: അയോദ്ധ്യാ രാമക്ഷേത്രത്തിലെ പ്രാണപ്രതിഷ്ഠാ ചടങ്ങിലേയ്ക്ക് കന്നട സിനിമാ സംവിധായകനും നടനുമായ ഋഷബ് ഷെട്ടിക്കും ക്ഷണം. ചടങ്ങിലേയ്ക്കുള്ള ക്ഷണപത്രിക കിട്ടിയ വിവരം താരം തന്നെയാണ് സോഷ്യൽ മീഡിയയിൽ പങ്കുവച്ചത്. ഇത്തരത്തിൽ ഒരു അവസരം ലഭിച്ചതിൽ വളരെയധികം സന്തോഷമുണ്ടെന്നും ഋഷബ് സമൂഹ മാദ്ധ്യമമായ ഇൻസ്റ്റഗ്രാമിൽ കുറിച്ചു.
‘ഇത്തരത്തിൽ ഒരു അവസരം ലഭിച്ചതിൽ എനിക്ക് വളരെയധികം നന്ദിയുണ്ട്. ‘രാമ ജയ ജയ് രാമ…’ എന്ന രാമനാമം ജപിച്ചും മുതിർന്നവരിൽ നിന്ന് രാമയണ കഥകൾ കേട്ടും ഭഗവൻ ശ്രീരാമന്റെ അനുഗ്രഹത്തോടെയുമാണ് ഞാൻ വളർന്നത്. ഇന്ന് ഭഗവാൻ ശ്രീരാമൻ ജനിച്ചു വളർന്ന് രാജാവായി വാഴുകയും ചെയ്ത അയോദ്ധ്യയിലേയ്ക്ക് എനിക്ക് ക്ഷണം ലഭിച്ചിരിക്കുന്നു. ഈ അവസരത്തിൽ ഞാൻ നന്ദി അറിയിക്കുകയാണ്.’ ജയ് ശ്രീറാം. ഋഷബ് ഷെട്ടി കുറിച്ചു.
View this post on Instagram
ജനുവരി 22 ന് നടക്കുന്ന പ്രാണപ്രതിഷ്ഠാ ചടങ്ങിൽ രാജ്യത്തിന് അഭിമാനമായ വമ്പൻ താരനിര തന്നെ അയോദ്ധ്യയിലെത്തുന്നുണ്ട്. ബോളിവുഡ് മുതൽ ദക്ഷിണേന്ത്യൻ സിനിമാ താരങ്ങൾക്ക് വരെ ചടങ്ങിലേക്ക് ക്ഷണം ലഭിച്ചിട്ടുണ്ട്. അമിതാഭ് ബച്ചൻ, മാധുരി ദീക്ഷിത്, ആയുഷ്മാൻ ഖുറാന, വിക്കി കൗശൽ, കത്രീന കൈഫ്, രൺബീർ കപൂർ, ആലിയ ഭട്ട്, അനുപം ഖേർ തുടങ്ങിയ വമ്പൻ താരങ്ങൾ പ്രാണ പ്രതിഷ്ഠയിൽ പങ്കെടുക്കും. തെന്നിന്ത്യൻ സിനിമാ ലോകത്ത് നിന്ന് ചിരഞ്ജീവി, രജനികാന്ത്, പ്രഭാസ് എന്നിവരും ചടങ്ങിൽ പങ്കെടുക്കും.
പ്രധാനമന്ത്രി നരേന്ദ്രമോദി, ആർഎസ്എസ് സർസംഘ ചാലക് ഡോ. മോഹൻ ഭാഗവത്, യുപി മുഖ്യമന്ത്രി യോഗി ആദിത്യനാഥ്, നൃത്യ ഗോപാൽ ജി മഹാരാജ്, യുപി ഗവർണർ തുടങ്ങി എല്ലാ ക്ഷേത്ര ട്രസ്റ്റിമാരും പ്രാണ പ്രതിഷ്ഠാ ചടങ്ങിൽ പങ്കെടുക്കും. 150-ലധികം സന്ന്യാസിമാരും വിവിധ മേഖലകളിൽ നിന്നുള്ള വിദഗ്ധരും പദ്മ പുരസ്കാര ജേതാക്കളും ചടങ്ങിന്റെ ഭാഗമാകും.
