ഭാര്യയെ കടലിൽ തള്ളിയിട്ട് കൊലപ്പെടുത്തിയ സൗത്ത് ഗോവയിലെ ആഡംബര ഹോട്ടൽ മാനജേർ പിടിയിൽ. 29-കാരനായ ഗൗരവ് കത്യാർ ആണ് അറസ്റ്റിലായത്. ദിക്ഷ ഗംഗ്വാറിന്റെ(27) കാെലപാതകമാണ് ഇയാൾ അപകട മരണമെന്ന് വരുത്തിതീർക്കാൻ ശ്രമിച്ചത്. ഗൗരവ് ജോലി ചെയ്യുന്ന ഹോട്ടലിൽ നിന്ന് ഏറെ അകലെയല്ലാത്ത കാബോ ഡെ രാമ ബീച്ചിലായിരുന്നു സംഭവം.
ഒരുവർഷം മുൻപായിരുന്നു ഇവരുടെ വിവാഹം. യുവാവിന്റെ വിവാഹേതര ബന്ധത്തെ ചൊല്ലിയുള്ള തർക്കങ്ങളാണ് കൊലപാതകത്തിലേക്ക് കലാശിച്ചത്. വെള്ളിയാഴ്ച വൈകിട്ട് 3.45നായിരുന്നു സംഭവം. കതിയാർ ഭാര്യയെ ബീച്ചിലേക്ക് എത്തിച്ചു. പാറക്കെട്ടുകൾ അധികമുള്ള സ്ഥലം നോക്കി തള്ളിയിട്ടു.
പിന്നാലെ ബീച്ചിലെത്തി ഭാര്യ മരിച്ചോ എന്ന് ഉറപ്പുവരുത്തിയ ശേഷം തിരികെ കയറി അലറാം മുഴക്കുകയായിരുന്നു. ഇതിന്റെ വീഡിയോ ഒരാൾ പകർത്തിയിരുന്നു. ഇതാണ് ഗൗരവിന് കെണിയായത്. യുവതിയുടെ ശരീരത്തിൽ മുറിവുകൾ പോലീസ് പരിശോധിച്ചു. 24 മണിക്കൂറിനകം കുറ്റവാളിയെ പോലീസ് അറസ്റ്റ് ചെയ്യുകയായിരുന്നു.
