അയോദ്ധ്യയിൽ ബാലരാമന്റെ പ്രാണ പ്രതിഷ്ഠയ്‌ക്ക് മണിക്കൂറുകൾ മാത്രമാണ് ഇനി ബാക്കിയുള്ളത്. പുലർച്ചെ 6 മണിക്ക് പൂജകൾ ആരംഭിച്ചു കഴിഞ്ഞു. രാജ്യമൊട്ടാകെ പുണ്യ നിമിഷത്തിനായുള്ള ആഹ്ലാദത്തിമിർപ്പിലാണ്. പ്രധാനസേവകൻ അയോദ്ധ്യയിൽ എത്തിച്ചേർന്നിരിക്കുകയാണ്. രാമമന്ത്രം രാജ്യമൊട്ടകെ മുഴങ്ങുന്ന വേളയിൽ ബാലരാമന്റെ ചിത്രം പങ്കുവച്ചിരിക്കുകയാണ് നടൻ സുരേഷ്ഗോപി.
ബാലരാമന്റെ ചിത്രം സമൂഹമാദ്ധ്യമത്തിലൂടെയാണ് പങ്കുവച്ചിരിക്കുന്നത്.’ജയ് ശ്രീറാം എന്റെ സീതാരാമൻ’ എന്ന കുറിപ്പോടെയാണ് ചിത്രം പങ്കുവച്ചിരിക്കുന്നത്. വിശ്വാസത്തിനും ആചാരത്തിനുമൊപ്പം പ്രാർത്ഥനാപൂർവ്വം, ജയ് ശ്രീറാം എന്ന തരത്തിലാണ് കൂടുതൽ പേരും കമന്റുകൾ പങ്കുവച്ചിരിക്കുന്നത്.
ഇന്ന് ഉച്ചയ്‌ക്ക് ഉച്ചയ്‌ക്ക് 12:29:8 മുതൽ 12:30: 32 നാഴിക വരെയുള്ള പവിത്രമായ അഭിജിത്ത് മുഹൂർത്തത്തിലാണ് രാംലല്ലയുടെ പ്രാണപ്രതിഷ്ഠ ചടങ്ങ് നടക്കുന്നത്. 84 സെക്കൻഡാണ് പ്രാണ പ്രതിഷ്ഠാ മുഹൂർത്തം. പവിത്രമായ പ്രാണ പ്രതിഷ്ഠ സമയത്ത് രാം ലല്ലയുടെ വിഗ്രഹത്തിന്റെ കണ്ണുകൾ തുറന്ന് അഞ്ജനമെഴുതും. തു‌ടർന്ന് വിഗ്രഹത്തെ കണ്ണാടി കാണിക്കും.
അതായത്, ഭഗവാൻ തന്നെ ആദ്യം ഭഗവാനെ കാണും. ഈ സമയം ക്ഷേത്രത്തിൽ സൈന്യത്തിന്റെ ഹെലികോപ്റ്ററുകളിൽ പുഷ്പവൃഷ്ടി നടത്തും. 30-ഓളം വരുന്ന കലാകാരന്മാർ വിവിധ വാദ്യോപകരണങ്ങൾ വായിക്കും. ചടങ്ങിൽ സംബന്ധിക്കാനെത്തുന്നവർക്ക് പ്രത്യേക മണി നൽകും അവയും ഈ സമയം മുഴക്കും.
