അയോദ്ധ്യ രാമക്ഷേത്ര പ്രതിഷ്ഠയോടനുബന്ധിച്ച് സംസ്ഥാനത്ത് ആഘോഷങ്ങൾ നടന്നു. വിവിധ ക്ഷേത്രങ്ങളിൽ രാവിലെ മുതൽ പ്രത്യേക പൂജകളും നടന്നിരുന്നു. കോട്ടയം രാമപുരം ക്ഷേത്രത്തിലും കലൂർ പാവക്കുളം മഹാദേവ ക്ഷേത്രത്തിലെയും ചടങ്ങിൽ പങ്കെടുക്കാൻ നിരവധി ഭക്തരാണെത്തിയത്. കച്ചേരിപ്പടി–ചിറ്റൂർ റോഡിലുള്ള അയ്യപ്പൻകാവ് ശ്രീധർമ ശാസ്താ ക്ഷേത്രത്തിൽ പുലർച്ചെ നടൻ മോഹൻലാൽ നിർമാല്യ ദർശനം നടത്തി.
വിശ്വഹിന്ദു പരിഷത്തിന്റെ നേതൃത്വത്തിലുള്ള പാവക്കുളം ക്ഷേത്രത്തിലായിരുന്നു പ്രാണപ്രതിഷ്ഠയോടനുബന്ധിച്ച പ്രധാന ചടങ്ങുകൾ നടന്നത്.
ബിജെപി സംസ്ഥാന അദ്ധ്യക്ഷന് കെ. സുരേന്ദ്രന് കോട്ടയം രാമപുരം ക്ഷേത്രത്തിലെ ചടങ്ങിലാണ് പങ്കെടുത്തത്. വയനാട്ടിലും വിപുലമായ ആഘോഷങ്ങൾ നടന്നിരുന്നു. സുൽത്താൻബത്തേരി മഹാഗണപതി ക്ഷേത്രത്തിൽ ക്രമീകരിച്ച ചടങ്ങിൽ ബിജെപി സംസ്ഥാന പ്രഭാരി പ്രകാശ് ജാവദേക്കറും തുഷാർ വെള്ളാപ്പള്ളിയും പങ്കെടുത്തിരുന്നു.
പാലക്കാട് വടക്കന്തറ ക്ഷേത്ര മൈതാനിയിൽ ശ്രീരാമ ജ്യോതി തെളിയിച്ചായിരുന്നു ചടങ്ങുകൾ നടന്നത്. ദേവീ ദേവന്മാരുടെ രൂപങ്ങളിൽ ഉൾപ്പെടെയാണ് വടക്കന്തറയിൽ വിശ്വാസികൾ രാജ ജ്യോതി തെളിയിച്ചിരിക്കുന്നത്. തിരുവനന്തപുരം വഴുതക്കാട് ക്ഷേത്രത്തിൽ നടന്ന ചടങ്ങിൽ കേരള ഗവർണർ ആരിഫ് മുഹമ്മദ് ഖാൻ പങ്കെടുത്തിരുന്നു.
