പ്രഭാത ഭക്ഷണം കഴിക്കാതിരിക്കരുതെന്നു പറഞ്ഞു കേട്ടിട്ടില്ലേ? ദിവസം ആരോഗ്യത്തോടെയും ഉന്മേഷത്തോടെയും തുടങ്ങേണ്ടത് അത്യാവശ്യമാണ്. അതിൽ പ്രധാനപ്പെട്ട ഒന്നാണ് പ്രഭാത ഭക്ഷണം. എന്നാൽ ആരോഗ്യം വർദ്ധിപ്പിക്കുന്ന തരത്തിലുള്ള പോഷക ഘടകങ്ങൾ അടങ്ങിയ ഭക്ഷണങ്ങൾ തിരഞ്ഞെടുക്കേണ്ടത് അത്യാവശ്യമാണ്. ഇങ്ങനെയുള്ള ഘട്ടങ്ങൾ വരുമ്പോൾ പൊറോട്ട പോലുള്ള ഭക്ഷണങ്ങൾ നാം പ്രഭാത ഭക്ഷണത്തിൽ നിന്നും തള്ളികളയുകയാണ് പതിവ്. എന്നാൽ പൊറോട്ടകളെ ഇഷ്ടപ്പെടുന്നവരാണെങ്കിൽ പ്രഭാത ഭക്ഷണമായി ദിവസവും ഇത് കഴിക്കാം. പക്ഷേ ഇക്കാര്യങ്ങൾ ശ്രദ്ധിക്കേണ്ടതുണ്ട്..
മൈദ അടങ്ങിയ പൊറോട്ടകൾക്ക് പകരം ഗോതമ്പ് പൊറോട്ടയോ മൾട്ടിഗ്രെയിൻ മാവ് കൊണ്ടുണ്ടാക്കിയ പൊറോട്ടയോ തിരഞ്ഞെടുക്കാം. ഇത് ദഹനത്തെ മെച്ചപ്പെടുത്തുന്നതിനോടൊപ്പം ഊർജം നൽകാനും സഹായിക്കുന്നു. ഇത്തരം പൊറോട്ടകൾ സ്വാദിഷ്ടമാക്കാൻ ഇവയ്ക്കുള്ളിൽ പച്ചക്കറികളും മസാലകളുമിട്ട് സ്റ്റഫ് ചെയ്തെടുത്ത് കഴിക്കാം. പൊറോട്ട ഉണ്ടാക്കുമ്പോൾ എണ്ണ പരമാവധി കുറയ്ക്കാൻ ശ്രമിക്കുക. ഗോതമ്പ് പൊറോട്ടകൾ ഉണ്ടാക്കുമ്പോൾ ഇവയ്ക്കൊപ്പം അൽപം കറുവപ്പട്ടാ പൊടിച്ചതോ ഇഞ്ചി ചതച്ചതോവായ ചേരുവകൾ ചേർക്കുന്നത് രുചി വർദ്ധിപ്പിക്കുന്നതിനൊപ്പം ആന്റി ഓക്സിഡന്റൽ ഗുണങ്ങളും നൽകുന്നു. കുടലിന്റെ ആരോഗ്യം മെച്ചപ്പെടുത്താൻ ഗോതമ്പ് പൊറോട്ടകൾ തൈരോ, സലാഡുകളോ ചേർത്ത് കഴിക്കാം. പയറു വർഗങ്ങളും പച്ചക്കറികളും ചേർത്ത് തയ്യാറാക്കിയ കറികളും ഇവയ്ക്കൊപ്പം കഴിക്കാം. ഇത് ശരീരത്തിലേക്ക് ആവശ്യമായ പോഷക ഘടകങ്ങൾ പ്രദാനം ചെയ്യാൻ സഹായിക്കുന്നു. ദിനവും ഇത്തരം പൊറോട്ടകൾ കഴിക്കാമെങ്കിലും പരമാവധി ഒരു സമയം മാത്രം ഇവ കഴിക്കാൻ ശ്രദ്ധിക്കണമെന്നും വിദഗ്ധർ പറയുന്നു.