ശ്രീനഗർ: ജമ്മുകശ്മീരിൽ ഭീകരവാദ പ്രവർത്തനങ്ങൾ നടത്തുന്നതിനായി ധനസഹായം സ്വീകരിച്ച ഹിസ്ബുൾ മുജാഹിദ്ദീൻ ഭീകരർക്കെതിരെ കുറ്റപത്രം സമർപ്പിച്ച് ഇഡി. കള്ളപ്പണം വെളുപ്പിക്കൽ നിയമപ്രകാരം മുദാസിർ അഹമ്മദ് ഷെയ്ഖ്, മുഷ്താഖ് അഹമ്മദ് കാംബെ, മുഹമ്മദ് ഇഖ്ബാൽ ഖാൻ എന്നിവർക്കെതിരെയാണ് ഇഡി പ്രത്യേക കോടതിയിൽ കുറ്റപത്രം സമർപ്പിച്ചിരിക്കുന്നത്.
കേസിന്റെ വിചാരണ ഉടൻ തന്നെ ആരംഭിക്കുമെന്ന് ഉദ്യോഗസ്ഥർ അറിയിച്ചു. 2015-ലാണ് ജമ്മു കശ്മീർ പോലീസ് ഐപിസി, യുഎപിഎ വകുപ്പുകൾ പ്രകാരം പ്രതികൾക്കെതിരെ കേസെടുത്തത്. പിന്നീട് കേസ് ഇഡി ഏറ്റെടുക്കുകയായിരുന്നു. 33 സ്വർണ്ണ നാണയങ്ങളും 17.50 ലക്ഷം രൂപയും പ്രതികളുടെ കയ്യിൽ നിന്ന് കണ്ടെത്തി.
ഭീകര സംഘടനയായ ഹിസ്ബുൾ മുജാഹിദ്ദീന്റെ നിർദ്ദേശപ്രകാരം പ്രതികൾ കശ്മീരിൽ ഭീകരവാദ പ്രവർത്തനങ്ങൾ നടത്തുന്നതിനായി ഫണ്ട് ശേഖരിച്ചു. അതുവഴി ഭീകരാക്രമണങ്ങൾ ഏകോപിപ്പിച്ച് രാജ്യത്തിന്റെ സമാധാനവും ഐക്യവും തകർത്തുവെന്നും ഇഡി വ്യക്തമാക്കുന്നു.
