നടനും കാസ്റ്റിംഗ് ഡയറക്ടറുമായ രാജേഷ് മാധവൻ വിവാഹിതനാകുന്നു. കാസർകോട് സ്വദേശിയായ ദീപ്തി കാരാട്ട് ആണ് വധു. ‘ന്നാ താൻ കേസ് കൊട്’ എന്ന ചിത്രത്തിന്റെ അസിസ്റ്റന്റ് ഡയറക്ടർമാരിൽ ഒരാളായിരുന്നു ദീപ്തി. ഇരുവരും ഏറെക്കാലമായി പ്രണയത്തിലായിരുന്നു. രാജേഷിനും ദീപ്തിക്കും ആശംസകൾ നേർന്ന് സഹപ്രവർത്തകരും സുഹൃത്തുക്കളുമടക്കം നിരവധിപ്പേർ എത്തി.
‘അങ്ങനെ അതുറപ്പിച്ചു’ എന്ന ക്യാപ്ഷനോടെയാണ് രാജേഷ് വിവാഹ വിശേഷങ്ങൾ അറിയിച്ചത്. ഒപ്പം ഇരുവരുടെയും ചിത്രങ്ങളും പങ്കുവച്ചു. ടെലിവിഷൻ പരിപാടികളിലൂടെയാണ് രാജേഷ് കരിയർ ആരംഭിച്ചത്. സനൽ അമന്റെ അസ്തമയം എന്ന ചിത്രത്തിന്റെ പ്രൊഡക്ഷൻ കൺട്രോളറായി സിനിമയിലെത്തി. പിന്നീട് സിനിമയിൽ ചെറിയ വേഷങ്ങളിൽ അഭിനയിച്ചു തുടങ്ങി. ദിലീഷ് പോത്തൻ സംവിധാനം ചെയ്ത മഹേഷിന്റെ പ്രതികാരമായിരുന്നു താരത്തിന്റെ കരിയറിൽ വഴിത്തിരിവായത്. പെണ്ണും പൊറാട്ടും എന്ന സിനിമയിലൂടെ സംവിധായകനാകാനുള്ള ഒരുക്കത്തിലുമാണ് രാജേഷ് മാധവൻ.
