നമ്മുടെ ഭക്ഷണത്തിൽ ധാരാളമായി ഉൾപ്പെടുത്തേണ്ടുന്ന വിഭവമാണ് ഇലക്കറികൾ. ദിവസേന നമ്മൾ കഴിക്കുന്ന ഭക്ഷണത്തിൽ ഒരു ചെറിയ അളവിലെങ്കിലും ഇലക്കറികൾ ഉൾപ്പെടുത്തേണ്ടതുണ്ട്. ഇത്തരത്തിൽ ഏറെ സവിശേഷതകളും ആരോഗ്യഗുണങ്ങൾ ഏറെയുള്ളതുമായ ഒരു ഇലക്കറിയാണ് ചായമൻസ. പേരുകേൾക്കുമ്പോൾ കുറച്ച് പരിഷ്കാരിയാണെന്നൊക്കെ തോന്നുമെങ്കിലും കേരളത്തിൽ ഇപ്പോൾ വളരെ സുലഭമാണ് ചായമൻസ. പറഞ്ഞാൽ തീരാത്തത്ര ആരോഗ്യ ഗുണങ്ങളാണ് ചായമൻസക്കുള്ളത്.
ട്രീ ചീര, മായൻ ചീര, മെക്സിക്കൻ ചീര എന്നിങ്ങനെ നിരവധി പേരുകൾ ചായമൻസക്കുണ്ട്. അധികം പരിചരണമില്ലാതെ വളരെ പെട്ടെന്ന് വളരുന്ന ഒരു വിളയാണ് ചായമൻസ. കുറ്റിച്ചെടിയായി വളരുന്ന ചായമൻസ വീടിന്റെ മട്ടുപ്പാവിലും നട്ടുവളർത്താവുന്നതാണ്. കാഴ്ചയിൽ മുരുക്കിന്റെ ഇലയോട് ചായമൻസയ്ക്ക് സാമ്യമുണ്ട്.
നിറയെ ആരോഗ്യഗുണങ്ങൾ പ്രാദാനം ചെയ്യുന്ന ഇലക്കറിയാണെങ്കിലും ചായമൻസ നന്നായി വേവിച്ച് മാത്രമേ കഴിക്കാൻ പാടുള്ളു. മരച്ചീനിയുടെ ഇലയിൽ അടങ്ങിയിട്ടുള്ളത് പോലുള്ള മട്ട് ഇതിന്റെ ഇലയിൽ അടങ്ങിയിട്ടുണ്ട്. അത് ആരോഗ്യത്തിന് ദോഷം ചെയ്യുന്നവയാണ്. കുറഞ്ഞത് 15 മിനിട്ടെങ്കിലും ചായമൻസയുടെ ഇലകൾ വേവിക്കണം. വിറ്റാമിൻ സി, ബീറ്റാകരോട്ടിൻ, പ്രോട്ടീൻ, ഫോസ്ഫറസ്, അയൺ എന്നിവയുടെ കലവറയാണ് ചായമൻസ. മുട്ടക്ക് സമാനമായ പ്രോട്ടിൻ കൂടിയാണിത്. രക്തയോട്ടം വർദ്ധിപ്പിക്കാനും രക്തത്തിലെ ഓക്സിജന്റെ അളവ് കൂട്ടാനും ചായമൻസ സഹായിക്കുന്നു.
അമിതവണ്ണം കാരണം ബുദ്ധിമുട്ടുന്നവർക്ക് ഭക്ഷണത്തിൽ ഉപയോഗിക്കാവുന്ന ഒരു വിഭവമാണ് ചായമൻസ. കലോറി കുറച്ച് ശരീരത്തിലെ കൊഴുപ്പിനെ ഇല്ലാതാക്കാൻ ചായമൻസ സഹായിക്കും. ഒപ്പം പലതരത്തിലുള്ള ദഹനപ്രശ്നങ്ങൾക്കും ചായമൻസ ഒരു പരിഹാരമാണ്. നല്ല ദഹനത്തിനും മലബന്ധം പരിഹരിക്കുന്നതിനും സഹായിക്കും.
ചുമക്കും ജലദോഷത്തനും ചായമൻസ ഉപയോഗിക്കാവുന്നതാണ്. ചുമയും ജലദോഷവും അനുഭവപ്പെടുന്ന സമയത്ത് ചായമൻസ ധാരാളം കഴിക്കുന്നതിലൂടെ ആശ്വാസം ലഭിക്കും. ഇത് ദിവസവും കഴിക്കുന്നതിലൂടെ വിളർച്ച ഇല്ലാതാകുന്നു. കൂടാതെ അനീമിയ പോലുള്ള പ്രശ്നങ്ങൾക്കും ഉത്തമമാണ്. പ്രമേഹത്തിനും ഉത്തമമാണ്.
തോരനായും കറിയായും ചായമൻസ പാകം ചെയ്യാവുന്നതാണ്. ഫ്രൈ ചെയ്തും ബജി, സൂപ്പ്, പക്കോഡ എന്നിവയും തയ്യാറാക്കാവുന്നതാണ്. ഇത് കൂടാതെ മറ്റ് കറികൾക്കൊപ്പവും ചപ്പാത്തിയിലും ചേർത്ത് പാകം ചെയ്ത് കഴിക്കാവുന്നതാണ്.
