സംഗീതജ്ഞൻ ഇളയരാജയുടെ മകളും ഗായികയും സംഗീത സംവിധായകയുമായിരുന്ന ഭവതാരിണി കഴിഞ്ഞ ദിവസമാണ് മരണത്തിന് കീഴടങ്ങിയത്. ക്യാൻസർ ബാധിതയായി ചികിത്സയിലിരിക്കെ ശ്രീലങ്കയിൽ വച്ചാണ് മരണം സംഭവിച്ചത്. ഒരുപക്ഷേ തെന്നിന്ത്യൻ സംഗീത ലോകത്തെയാകെ ദുഃഖത്തിലാഴ്ത്തിയ ഒരു സംഭവം കൂടിയായിരുന്നു ഭവതാരിണിയുടെ വിയോഗം. ഇപ്പോഴിതാ ഭവതാരിണിക്കൊപ്പമുള്ള അവസാന ചിത്രം പങ്കുവച്ചിരിക്കുകയാണ് നടനും സംവിധായകനുമായ വെങ്കട് പ്രഭു.
View this post on Instagram
സമൂഹമാദ്ധ്യമമായ ഇൻസ്റ്റഗ്രാമിലൂടെയാണ് അദ്ദേഹം ഭവതാരിണിക്കൊപ്പമുള്ള ചിത്രം പങ്കുവച്ചത്.’ഭവത, നമ്മളൊരുമിച്ചുള്ള അവസാന ചിത്രം’ എന്ന ക്യാപ്ഷനോടെയായിരുന്നു ചിത്രം പങ്കുവച്ചത്. കൂടാതെ യുവൻ ശങ്കർ രാജക്കും സുഹൃത്തുക്കൾക്കുമൊപ്പമുള്ള ചിത്രവും അദ്ദേഹം പങ്കുവച്ചു.
ഇളയരാജയുടെ അനുജനും സംഗീതജ്ഞനുമായ ഗംഗയ് അമരന്റെ മകനാണ് വെങ്കട്ട് പ്രഭു. അദ്ദേഹത്തിന്റെ ഗോവ, മാനാട് എന്നീ ചിത്രങ്ങളിൽ ഭവതാരിണി പാടിയിട്ടുണ്ട്. കഴിഞ്ഞ ദിവസം ഇളയരാജയും ഭവതാരിണിയുടെ ഓർമ്മച്ചിത്രം പങ്കുവച്ചിരുന്നു. അൻപ് മകളേ എന്ന കുറിപ്പോടെയായിരുന്നു അദ്ദേഹം ചിത്രം പങ്കുവച്ചത്.
