ന്യൂഡൽഹി: സൊമാലിയൻ കടൽക്കൊള്ളക്കാരിൽ നിന്ന് രക്ഷപ്പെടുത്തിയ പാകിസ്താൻകാരായ 19 ജീവനക്കാരുടേയും, രക്ഷാപ്രവർത്തനത്തിന്റേയും വീഡിയോ പങ്കുവച്ച് ഇന്ത്യൻ നാവികസേന. അൽ നയീമി എന്ന ഇറാനിയൻ മത്സ്യബന്ധനക്കപ്പലിലെ ജീവനക്കാരെയാണ് നാവികസേനയുടെ നേതൃത്വത്തിൽ മോചിപ്പിച്ചത്. കടൽക്കൊള്ളക്കാരിൽ കപ്പൽ ജീവനക്കാരെ രക്ഷപ്പെടുത്തയതിന് ശേഷം നാവികസേനാംഗങ്ങൾ ഇവരോട് യാത്ര പറയുന്ന വീഡിയോ ആണ് പുറത്ത് വന്നിരിക്കുന്നത്. സേനയിലെ ഒരു ഉദ്യോഗസ്ഥൻ ഇവർക്ക് സുരക്ഷിതമായ യാത്ര ആശംസിക്കുന്നതും വീഡിയോയിൽ കേൾക്കാം. ” ബൈ ബൈ, ആരാം സേ ജാനാ” എന്നാണ് ഉദ്യോഗസ്ഥൻ ഇവരോട് പറയുന്നത്.
നാവികസേനയുടെ ഐഎൻഎസ് സുമിത്രയാണ് രക്ഷാപ്രവർത്തനത്തിന് നേതൃത്വം നൽകിയത്. കടൽക്കൊള്ളക്കാരേയും നാവികസേന കസ്റ്റഡിയിലെടുത്തിരുന്നു. സൊമാലിയൻ കടൽക്കൊള്ളക്കാർ കപ്പൽ തട്ടിയെടുത്ത തങ്ങളെ ബന്ദികളാക്കിയതായി ഒരു പാകിസ്താൻ ജീവനക്കാരൻ വിശദീകരിക്കുന്നതായി നാവികസേന പങ്കുവച്ച വീഡിയോയിൽ കാണാം. നാവികസേനയുടെ കപ്പൽ ഇതിന് അടുത്തേക്ക് വന്നതോടെ കടൽക്കൊള്ളക്കാർ ഭയന്ന് കീഴടങ്ങുകയായിരുന്നുവെന്നും ഇദ്ദേഹം പറയുന്നു.
” സായുധരായ സൊമാലിയൻ കടൽക്കൊള്ളക്കാരിൽ നിന്ന് ഞങ്ങളെ രക്ഷപ്പെടുത്തിയ സൈനികർക്ക് നന്ദി പറയുകയാണ്. നിങ്ങൾ ഞങ്ങളുടെ ജീവൻ രക്ഷിച്ചുവെന്നും” പാകിസ്താൻ പൗരനായ ഇദ്ദേഹം നന്ദി സൂചകമായി പറയുന്നു. 11 കടൽക്കൊള്ളക്കാരാണ് കപ്പൽ തട്ടിയെടുത്തത്. പിന്നാലെ കപ്പലിലെ ജീവനക്കാരേയും ഇവർ ബന്ദികളാക്കുകയായിരുന്നു. ബന്ദികളായവരെ രക്ഷപ്പെടുത്തിയതിന് ശേഷം ആരോഗ്യപരിശോധനകൾ ഉൾപ്പെടെ നടത്തിയാണ് നാവികസേന തിരികെ മടങ്ങാൻ അനുവദിച്ചത്.
