മുൻ ഉപപ്രധാനമന്ത്രിയായ എൽ.കെ അദ്വാനിക്ക് പരമോന്നത സിവിലിയൻ ബഹുമതിയായ ഭാരതരത്ന നൽകിയതിൽ സന്തോഷം അറിയിച്ച് സുരേഷ് ഗോപി. അർഹതപ്പെട്ട ആദരവാണ് എൽ. കെ അദ്വാനിജിക്ക് ലഭിച്ചിരിക്കുന്നതെന്ന് അദ്ദേഹം വ്യക്തമാക്കി. സമൂഹമാദ്ധ്യമമായ ഫേസ്ബുക്കിലൂടെയാണ് താരം സന്തോഷം പ്രകടിപ്പിച്ച് രംഗത്തെത്തിയത്. എൽ. കെ അദ്വാനിക്കൊപ്പം നിൽക്കുന്നതിന്റെ ചിത്രവും സുരേഷ് ഗോപി പങ്കുവച്ചു.
” എൽ. കെ അദ്വാനിജിക്ക് ലഭിക്കേണ്ട അർഹമായ ആദരമാണ് ഭാരതരത്ന. രാജ്യത്തിനോടുള്ള അദ്ദേഹത്തിന്റെ അചഞ്ചലമായ പ്രതിബദ്ധതയ്ക്കും രാഷ്ട്രസേവനത്തിനുമുള്ള ആദരമാണിത്. രാഷ്ട്രത്തിന്റെ ഐക്യവും തത്വങ്ങളും സമൃദ്ധിയും ഉയർത്തി പിടിക്കുന്നതിൽ അദ്ദേഹം നിരവധി സംഭാവനകൾ നൽകി. അദ്ദേഹത്തിന് ലഭിച്ച ഈ ആദരം ഭാവി തലമുറയെ പ്രചോദിപ്പിക്കട്ടെ. ഈ അഭിമാനകരമായ ബഹുമതിക്ക് അഭിനന്ദനങ്ങൾ”- സുരേഷ് ഗോപി കുറിച്ചു.
ഇന്ന് ഉച്ചയോടെ പ്രധാനമന്ത്രി നരേന്ദ്രമോദിയാണ് എൽ.കെ അദ്വാനിക്ക് ഭാരതരത്നം ലഭിച്ച വിവരം പങ്കുവച്ചത്.
അദ്വാനിയെ നേരിട്ട് സന്ദർശിച്ചാണ് പ്രധാനമന്ത്രി സന്തോഷം പങ്കുവച്ചത്. ഭാരതം കണ്ടതിൽ വച്ച് ഏറ്റവും ആദരണീയനായ രാഷ്ട്രതന്ത്രജ്ഞരിൽ ഒരാളാണ് അദ്ദേഹമെന്നും രാജ്യത്തിന്റെ വികസനത്തിന് അദ്ദേഹം നൽകിയ സംഭവനകൾ വിലമതിക്കാനാവത്തതാണെന്നും പ്രധാനമന്ത്രി അറിയിച്ചു. പ്രതിരോധ മന്ത്രി രാജ്നാഥ് സിംഗ്, ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ, ഉത്തർ പ്രദേശ് മുഖ്യമന്ത്രി യോഗി ആദിത്യനാഥ് തുടങ്ങി ഒട്ടനവധി നേതാക്കളും സന്തോഷം പ്രകടിപ്പിച്ചിരുന്നു.