മലയാളികളുടെ ഇഷ്ട നടിയാണ് മംമ്ത മോഹൻദാസ്. മലയാളത്തിലെന്നതു പോലെ തന്നെ അന്യ ഭാഷകളിലും വളരെ പെട്ടന്ന് തന്റേതായ ഒരു സ്ഥാനം താരത്തിന് നേടിയെടുക്കാൻ സാധിച്ചിട്ടുണ്ട്. സിനിമകളിൽ തിളങ്ങി നിൽക്കുന്ന സമയത്താണ് താരത്തിന് കാൻസർ പിടിപ്പെട്ടത്. എന്നാൽ അതിനെ പോരാടി തോൽപ്പിച്ച് സിനിമാ ലോകത്തേക്ക് പൂർവ്വാധികം ശക്തിയോടെ തിരിച്ചു വന്ന താരമാണ് മംമ്ത. ലോക കാൻസർ ദിനത്തിൽ താരം പങ്കുവച്ച പോസ്റ്റാണ് ഇപ്പോൾ സമൂഹ മാദ്ധ്യമങ്ങളിൽ ശ്രദ്ധ നേടുന്നത്. ബോളിവുഡ് നടിയും മോഡലുമായ പൂനം പാണ്ഡെയുടെ വ്യാജ മരണ വാർത്തയ്ക്കെതിരെയുള്ള വിമർശനം കൂടിയായാണ് താരം പോസ്റ്റ് പങ്കുവച്ചിരിക്കുന്നത്.
” കുറച്ചു പേർക്ക് ഇത് യഥാർത്ഥത്തിലുള്ള പോരാട്ടമാണ്. മറ്റു ചിലർക്ക് ചീഞ്ഞ പബ്ലിസിറ്റിക്ക് വേണ്ടിയുള്ള ആയുധവും. കാൻസർ തമാശയല്ല. ഇത് ബാധിച്ചവർ സ്വയം നിങ്ങളെ നോക്കണം, ശ്രദ്ധിക്കണം. ആദ്യം നിങ്ങൾക്ക് പരിഗണന നൽകാൻ ശ്രമിക്കുക. കാൻസറിന് നിങ്ങളെ തോൽപ്പിക്കാൻ സാധിക്കില്ല. എന്നാൽ അതിനെ നിങ്ങൾക്ക് പോരാടി തോൽപ്പിക്കാനാകും. യുദ്ധം ചെയ്യുന്നവരെയും പോരാടി ജീവൻ വെടിഞ്ഞവരെയും ഈ ദിവസത്തിൽ ആദരിക്കുകയും സ്മരിക്കുകയും ചെയ്യുന്നു”.- മംമ്ത കുറിച്ചു.
സെർവിക്കൽ കാൻസർ പിടിപ്പെട്ട് നടി പൂനം പാണ്ഡെ മരിച്ചുവെന്ന് താരത്തിന്റെ മാനേജർ പങ്കുവച്ച വ്യാജ മരണവാർത്തക്ക് പിന്നാലെ വൻ വിമർശനങ്ങളാണ് ഉയർന്നു വന്നത്. കാൻസർ പിടിപ്പെട്ട നടിമാരിലൊരാളായ മംമ്തയും തന്റെ പോസ്റ്റിലൂടെ രോഷം അറിയിച്ചിരിക്കുകയാണ്. 2009ലാണ് മംമ്തയ്ക്ക് കാൻസർ പിടിപ്പെട്ടത്. പിന്നീട് നീണ്ട പോരാട്ടങ്ങൾക്കൊടുവിൽ 2013ലാണ് താരം രോഗമുക്തി നേടിയത്. ഇതിന് ശേഷം വീണ്ടും താരം സിനിമാ രംഗത്തേക്ക് തിരികെ വന്നെങ്കിലും വിറ്റിലിഗോ എന്ന ത്വക്ക് രോഗം ബാധിച്ച് ചികിത്സയിലാണ് താരം.