മുംബൈ: ചരിത്രം സൃഷ്ടിച്ച് ടാറ്റ ഗ്രൂപ്പ്. വിപണി മൂല്യത്തിൽ 30 ലക്ഷം കോടി കടന്ന രാജ്യത്തെ ആദ്യത്തെ കോർപ്പറേറ്റ് ഗ്രൂപ്പ് എന്ന ബഹുമതിയാണ് ടാറ്റ സ്വന്തമാക്കിയത്. രണ്ടാം സ്ഥാനം മുകേഷ് അംബാനിയുടെ നേതൃത്വത്തിലുള്ള റിലയൻസ് ഗ്രൂപ്പ് സ്വന്തമാക്കി. 21.6 ലക്ഷം കോടിയാണ് ഗ്രൂപ്പിന്റെ വിപണി മൂലധനം. 15.5 ലക്ഷം കോടി രൂപയുമായി അദാനി ഗ്രൂപ്പാണ് മൂന്നാം സ്ഥാനത്ത്.
ഇന്ത്യൻ സ്റ്റോക്ക് മാർക്കറ്റിൽ ടാറ്റ ഗ്രൂപ്പിന്റെ 25 കമ്പനികളാണ് ലിസ്റ്റ് ചെയ്തിട്ടുള്ളത്. അഞ്ച് കമ്പനികളാണ് ഗ്രൂപ്പിന്റെ വിപണി മൂല്യത്തിന്റെ എൺപത് ശതമാനവും സംഭാവന ചെയ്തിരിക്കുന്നത്. രാജ്യത്തെ ഏറ്റവും വലിയ ഐടി കമ്പനിയായ ടാറ്റ കൺസൾട്ടൻസി സർവീസസ് (ടിസിഎസ്) ആണ് ഗ്രൂപ്പിലെ ഏറ്റവും മൂല്യമുള്ള കമ്പനി. 15 ലക്ഷം കോടി രൂപയാണ് ടിസിഎസിന്റെ മൂല്യം.
ചൊവ്വാഴ്ച ഓഹരിവിപണി ആരംഭിച്ചതോടെ ടിസിഎസിന്റെ വിപണി മൂല്യം പുതിയ ഉയരത്തിലെത്തി. ടിസിഎസ് ഓഹരി നാല് ശതമാനം ഉയർന്നു. ട്രാവൽ ഇൻഷുറൻസ് കമ്പനിയായ യൂറോപ്പ് അസിസ്റ്റൻസുമായി കമ്പനി നടത്തിയ കരാറാണ് ഉയർച്ചയ്ക്ക് കാരണം. ഇതോടെ കമ്പനിയുടെ മാത്രം വിപണി മൂല്യം ആദ്യമായി 15 ലക്ഷം കോടി കവിഞ്ഞു.
എച്ച്ഡിഎഫ്സി ഗ്രൂപ്പ് വിപണി മൂല്യത്തിൽ നാലാം സ്ഥാനത്താണ്. ഗ്രൂപ്പിന്റെ മൂല്യം 13 ലക്ഷം കോടി രൂപയാണ്. 10 ലക്ഷം കോടി രൂപയുമായി ലിസ്റ്റിൽ അഞ്ചാം സ്ഥാനത്താണ് ബജാജ് ഗ്രൂപ്പ്.
മുംബൈ ആസ്ഥാനമായി പ്രവർത്തിക്കുന്ന ടാറ്റ ഗ്രൂപ്പ്, ആറ് ഭൂഖണ്ഡങ്ങളിലായി 100 രാജ്യങ്ങളിലാണ് പ്രവർത്തിക്കുന്നത്. രത്തൻ ടാറ്റയാണ് ഗ്രൂപ്പിന്റെ ചെയർമാൻ. ടാറ്റ സൺസിന്റെ ചെയർമാൻ പദവി വഹിക്കുന്നത് നടരാജൻ ചന്ദ്രശേഖരനാണ്.