മലയാളികളുടെ പ്രിയ നായികയാണ് അനുശ്രീ നായർ. ലാൽ ജോസ് സംവിധാനം ചെയ്ത ഡയമണ്ട് നെക്ലസ് എന്ന ചിത്രത്തിലൂടെയാണ് താരം അഭിനയ രംഗത്തെത്തിയത്. സോഷ്യൽ മീഡിയയിലും സജീവമായ അനുശ്രീ തന്റെ വിശേഷങ്ങളെല്ലാം ആരാധകരുമായി പങ്കുവക്കാറുണ്ട്. അടുത്തിടെയായിരുന്നു കൊച്ചിയിൽ പുതിയ വീട് സ്വന്തമാക്കിയ വിശേഷം അനുശ്രീ പങ്കുവച്ചത്.
അനുശ്രീ നായർ എന്റെ വീട് എന്നാണ് താരത്തിന്റെ പുതിയ വീടിന്റെ പേര്. കഴിഞ്ഞ ദിവസമായിരുന്നു വീടിന്റെ പാലുകാച്ചൽ ചടങ്ങ് നടന്നത്. മലയാള സിനിമയിലെ നിരവധി താരങ്ങൾ അനുശ്രീയുടെ പുതിയ വീട്ടിൽ ആശംസകളുമായി എത്തിയിരുന്നു.
ഇപ്പോഴിതാ തനിക്ക് ആശംസകളുമായി എത്തിയവർക്ക് നന്ദി അറിയിച്ചിരിക്കുകയാണ് താരം. സമൂഹമാദ്ധ്യമമായ ഇൻസ്റ്റാഗ്രാമിൽ പങ്കുവച്ച പോസ്റ്റ് ശ്രദ്ധ നേടുകയാണ്.
‘ എന്റെ പ്രിയപ്പെട്ട സുഹൃത്തുക്കൾക്കും സഹപ്രവർത്തകർക്കും.. സിനിമാ മേഖലയിൽ എന്നും എനിക്കൊപ്പം നിൽക്കുന്നവരാണ് നിങ്ങൾ. ജനുവരി 26 ന് നിങ്ങളുടെ എല്ലാ തിരക്കുകളും മാറ്റിവെച്ച് എനിക്കൊപ്പം നിന്നതിന് നന്ദി.
നിങ്ങളുടെ സൗഹൃദവും അനുഗ്രഹവും എപ്പോഴും എനിക്കൊപ്പം ഉണ്ടാകണമെന്ന് ഞാൻ ആഗ്രഹിക്കുന്നു. എല്ലാവർക്കും നന്ദി… അനുശ്രീ കുറിച്ചു.
ഒപ്പം പ്രിയ താരങ്ങൾക്കൊപ്പമുള്ള ചിത്രങ്ങളും അനുശ്രീ ഇൻസ്റ്റഗ്രാമിൽ പങ്കുവച്ചിരുന്നു. ദിലീപ്, ഉണ്ണി മുകുന്ദൻ, നമിത പ്രമോദ്, അതിഥി രവി, അപർണ ബാലമുരളി, വിഷ്ണു ഉണ്ണി കൃഷ്ണൻ, സ്വാസിക, സണ്ണി വെയ്ൻ, സംവിധായകൻ ലാൽജോസ് തുടങ്ങി നിരവധി താരങ്ങൾ ചടങ്ങിൽ പങ്കെടുത്തു.