മലയാളികൾ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് വർഷങ്ങൾക്ക് ശേഷം. ചിത്രത്തിന്റെ ഓരോ അപ്ഡേഷനുകൾക്കും പ്രേക്ഷകരുടെയിടയിൽ വലിയ സ്വീകാര്യതയാണ്. ഇപ്പോഴിതാ ചിത്രത്തിന്റെ ടീസർ പുറത്തുവന്നിരിക്കുകയാണ്. യുവതാരങ്ങളെ അണിനിരത്തി ഒരുങ്ങുന്ന ചിത്രം വിനീത് ശ്രീനിവാസനാണ് സംവിധാനം ചെയ്യുന്നത്. പ്രണവ് മോഹൻലാലും ധ്യാൻ ശ്രീനിവാസനുമാണ് ചിത്രത്തിൽ പ്രധാന വേഷത്തിലെത്തുന്നത്.
പണ്ടത്തെ കാലഘട്ടത്തെ ആസ്പദമാക്കിയാണ് ചിത്രമൊരുങ്ങുന്നത്. കോളേജ് കാലഘട്ടവും രസകരമായ സംഭവവികാസങ്ങളുമാണ് ടീസറിലുള്ളത്. പഴയ കാലത്തെ വേഷവിധാനങ്ങളും കെട്ടിടങ്ങളും ടീസറിലുണ്ട്. നിവിൻ പോളി, അജു വർഗീസ്, നീരജ് മാധവ്, കല്യാണി പ്രിയദർശൻ, ബേസിൽ ജോസഫ് എന്നീ താരങ്ങളുടെ വ്യത്യസ്തതയാർന്ന കഥാപാത്രങ്ങളെയും ടീസറിൽ കാണാം. ഏപ്രിൽ 11-നാണ് ചിത്രം തിയേറ്ററിലെത്തുന്നത്. ചുരുക്കം ചില സിനിമകളിലൂടെ മലയാളികളുടെ മനസിൽ ഇടംനേടിയ യുവതാരങ്ങൾ ഒരു സ്ക്രീനിലെത്തുന്നു എന്ന പ്രത്യേകതയും സിനിമയ്‌ക്കുണ്ട്.
ഹൃദയത്തിന് ശേഷം പ്രണവ് മോഹൻലാലും കല്യാണി പ്രിയദർശനും വീണ്ടും ഒരുമിക്കുന്ന ചിത്രം കൂടിയാണ് വർഷങ്ങൾക്ക് ശേഷം. വിവിധ കാലഘട്ടങ്ങളിൽ നടക്കുന്ന കഥയാണ് ചിത്രത്തിൽ പറയുന്നത്. ചിത്രത്തിൽ നാല് ലുക്കിലാണ് ധ്യാനും പ്രണവും എത്തുന്നത്. മലയാളികൾക്ക് വിഷു കൈനീട്ടമായി എത്തുന്ന ചിത്രത്തെ ആരാധകർ ആകാംക്ഷയോടെയാണ് കാത്തിരിക്കുന്നത്.
