അതി കഠിനമായ വേനൽക്കാലത്തിലൂടെയാണ് നാം കടന്നു പോകുന്നത്. പലയിടങ്ങളിലും 40 ഡിഗ്രിയിലധികം താപമാണ് രേഖപ്പെടുത്തുന്നത്. ഈ സമയങ്ങളിൽ സൂര്യാഘാതം ഏൽക്കുന്നതും, ഉഷ്ണകാല രോഗങ്ങളും പൊതുവെ വർദ്ധിച്ചു വരുന്ന സാഹചര്യമാണ്. ഇങ്ങനെയുള്ള സമയങ്ങളിൽ ശരീരം സുരക്ഷിതമാക്കുകയെന്നത് പ്രാധാന്യം അർഹിക്കുന്നതാകുന്നു. അതിനായി ഇക്കാര്യങ്ങൾ ശ്രദ്ധിക്കാം..
ധാരാളം വെള്ളം കുടിക്കുക
ശരീരത്തിൽ ജലാംശം നിലനിർത്തുകയെന്നതു തന്നെയാണ് വേനൽക്കാലത്ത് ശ്രദ്ധിക്കേണ്ട കാര്യങ്ങളിൽ പ്രധാനപ്പെട്ടത്. നിർജ്ജലീകരണം തടഞ്ഞ് ശരീരത്തെ തണുപ്പിക്കുന്നതിനായി ധാരാളം ശുദ്ധജലം കുടിക്കാം.
പഴ വർഗങ്ങൾ കഴിക്കുന്നത് ശീലമാക്കുക
ധാരാളം വെള്ളം കുടിക്കുന്നതിനൊപ്പം തന്നെ ഭക്ഷണത്തിൽ ഫല വർഗങ്ങൾ ഉൾപ്പെടുത്തി കഴിക്കുന്നതും ശരീരത്തെ തണുപ്പിക്കാൻ സഹായിക്കുന്നു. ഓറഞ്ച്, തണ്ണിമത്തൻ തുടങ്ങി ജലാംശം ധാരാളം അടങ്ങിയിട്ടുള്ള ഫലവർഗങ്ങൾ കഴിക്കുന്നത് നിർജ്ജലലീകരണം ഒരു പരിധി വരെ തടയാൻ സഹായിക്കുന്നു.
മദ്യപാനം ഒഴിവാക്കുക
ശരീരത്തെ ജലാംശം എളുപ്പത്തിൽ വലിച്ചെടുക്കാൻ മദ്യപാനം കാരണമാകുന്നു. അതിനാൽ തന്നെ വേനൽക്കാലത്തെ മദ്യപാന ശീലം പരമാവധി ഒഴിവാക്കാൻ ശ്രദ്ധിക്കുക. ഇത് ശരീരം പെട്ടന്ന് വരണ്ടതാക്കാൻ കാരണമാകുന്നു.
പുറത്തേക്ക് ഇറങ്ങുമ്പോൾ ഈ വസ്ത്രങ്ങൾ ധരിക്കുക
ചൂട് കൂടി വരികയാണ്. അതിനാൽ തന്നെ സിൽക്ക്, പോളിസ്റ്റർ തുടങ്ങിയ വസ്ത്രങ്ങൾ ധരിക്കുന്നത് ഒഴിവാക്കി കോട്ടൺ വസ്ത്രങ്ങൾ ധരിക്കുന്നത് ശീലമാക്കാം. ഇളം നിറത്തിലുള്ള വസ്ത്രങ്ങൾ ധരിക്കുക. കറുപ്പ് പോലുള്ള ഇരുണ്ട നിറത്തിലുള്ള വസ്ത്രങ്ങൾ ധരിക്കുന്നത് ചൂട് വേഗത്തിൽ ആഗിരണം ചെയ്യുന്നതിന് കാരണമാകുന്നു.