മുരിങ്ങയിലയുടെ ആരോഗ്യ ഗുണങ്ങൾ നമുക്കറിയാം. മുരിങ്ങയില ഉപയോഗിച്ച് കറി വയ്‌ക്കുന്നതും മറ്റ് മരുന്നുകൾക്കായി ഉപയോഗിക്കുന്നതും നമുക്കറിയാം. എന്നാൽ മുരിങ്ങയില പൊടിച്ച് ഉണ്ടാക്കുന്ന ചായയെക്കുറിച്ചും ഇവയുടെ ഗുണങ്ങളെക്കുറിച്ചും അധികം ആർക്കും ധാരണയുണ്ടാകില്ല. ഏറ്റവും അധിക പോഷക ഗുണങ്ങൾ അടങ്ങിയ ചായകളിൽ ഒന്നാണ് മുരിങ്ങ ചായ. അവശ്യ
വിറ്റാമിനുകളുടെയും ധാതുക്കളുടെയും കലവറയാണ് മുരിങ്ങ ചായ.
മുരിങ്ങയുടെ ഇലകൾ, കായ്കൾ, വിത്തുകൾ എന്നിവയിൽ ടാന്നിൻ, ഫ്‌ലേവനോയ്ഡുകൾ തുടങ്ങിയ അവശ്യ ഫൈറ്റോകെമിക്കലുകൾ അടങ്ങിയിട്ടുണ്ട്. ഇലകൾ നന്നായി പൊടിച്ചാണ് ചായ ഉണ്ടാക്കുന്നത്. മുരിങ്ങയില ചായയുടെ ഗുണങ്ങൾ എന്തെല്ലാമെന്ന് നോക്കാം…
ധാരാളം ആന്റി ഓക്‌സിഡന്റുകൾ അടങ്ങിയിരിക്കുന്നു
ആന്റി ഓക്‌സിഡന്റുകൾ, വിറ്റാമിൻ സി, ബീറ്റാ കരോട്ടിൻ എന്നിവയാൽ സമ്പുഷ്ടമാണ് മുരിങ്ങ ചായ. ശരീരത്തിലെ ഫ്രീ റാഡിക്കലുകളെ ചെറുക്കുന്നതിനും ഇല്ലാതാക്കുന്നതിനും ഇത് സഹായിക്കുന്നു. ഹാനികരമായേക്കാവുന്ന ഓക്‌സിഡേറ്റീവ് സ്‌ട്രെസ് ഉണ്ടാകുന്നത് തടയിടാൻ ഇതിന് സാധിക്കും. ഇതിൽ ക്വെർസെറ്റിൻ ധാരാളം അടങ്ങിയിട്ടുണ്ട്. രക്തത്തിലെ പഞ്ചസാരയുടെ അളവ് നിയന്ത്രിക്കാൻ ഇത് സഹായിക്കുന്നു.
ആന്റി ഇൻഫ്‌ലമേറ്ററി സംയുക്തങ്ങൾ അടങ്ങിയിട്ടുണ്ട്
മുരിങ്ങ ചായയിൽ ആന്റി ഇൻഫ്‌ലമേറ്ററി ഗുണങ്ങളുണ്ട്. വിട്ടുമാറാത്ത വീക്കം ഉയർന്ന രക്തസമ്മർദ്ദം ഉൾപ്പെടെയുള്ള പ്രശ്‌നങ്ങൾക്ക് മുരിങ്ങയില ചായ സഹായകമാണ്. മുരിങ്ങയിലെ ഫിനോളിക് ഗ്ലൈക്കോസൈഡുകളും മറ്റ് സംയുക്തങ്ങളും പ്രതിരോധശേഷി വർദ്ധിപ്പിക്കുന്നതിനും സഹായിക്കുന്നു.
ദഹനശേഷി വർദ്ധിക്കുന്നു
മുരിങ്ങ ചായയിലെ ആന്റി ഇൻഫ്‌ലമേറ്ററി സംയുക്തങ്ങൾ ദഹനം മെച്ചപ്പെടുത്താൻ സഹായിക്കുന്നു. ചായയിൽ അടങ്ങിയിരിക്കുന്ന ആന്റി ബാക്ടീരിയൽ ഗുണങ്ങൾ കുടലിന്റെ പ്രവർത്തനത്തെ സഹായിക്കുന്നു. മുരിങ്ങയിൽ വിറ്റമിൻ സി ധാരാളം അടങ്ങിയിരിക്കുന്നതിനാൽ ദഹനത്തിന് സഹായകമാണ്. കൂടാതെ അമിത വണ്ണം, മലബന്ധം തുടങ്ങിയ പ്രശ്‌നങ്ങൾക്കും പരിഹാരമാണ്.
ചർമ്മത്തിന്റെയും മുടിയുടെയും ആരോഗ്യം മെച്ചപ്പെടുത്തുന്നു
മുരിങ്ങയിൽ അടങ്ങിയിരിക്കുന്ന ആന്റി ഓക്സിഡന്റ് ഗുണങ്ങളിൽ ‘സൈറ്റോകിനിൻസ്’ എന്ന രാസവസ്തുവിന്റെ ഉയർന്ന സാന്ദ്രതയുണ്ട്. ഇത് കേടായ കോശങ്ങളെ നന്നാക്കാൻ സഹായിക്കുന്നു. കോശ വളർച്ച വർദ്ധിപ്പിക്കുകയും കൊളാജനെ സ്ഥിരപ്പെടുത്തുകയും ചെയ്യുന്നു. മുരിങ്ങ ചായയിൽ പ്രോട്ടീനുകളും ഒമ്പത് അവശ്യ അമിനോ ആസിഡുകളും അടങ്ങിയിട്ടുണ്ട്.
