കശ്മീരിന് പ്രത്യേക അധികാരം നൽകുന്ന ആർട്ടിക്കിൾ 370 റദ്ദാക്കിയ കേന്ദ്രസർക്കാർ നടപടിയുടെയും തുടർ സംഭവവികാസങ്ങളുടെയും കഥ പറയുന്ന സിനിമ ‘ആർട്ടിക്കിൾ 370’ ഫെബ്രുവരി 23 ന് തിയേറ്ററുകളിൽ. യാമി ഗൗതം കേന്ദ്ര കഥാപാത്രത്തെ അവതരിപ്പിക്കുന്ന സിനിമയിൽ പ്രിയാ മണിയും പ്രധാന വേഷത്തിൽ എത്തുന്നു. യഥാർത്ഥ സംഭവങ്ങളെ കൂട്ടിയിണക്കി തയാറാക്കിയിരിക്കുന്ന സിനിമയുടെ ട്രെയിലറും ടീസറും സമൂഹമാദ്ധ്യമങ്ങളിൽ വൈറലായിരുന്നു. ഇപ്പോഴിതാ ബോളിവുഡ് സൂപ്പർതാരം അജയ് ദേവഗൺ ശബ്ദം നൽകിയിരിക്കുന്ന പ്രൊലോഗ് പുറത്തുവിട്ടിരിക്കുകയാണ് അണിയറപ്രവർത്തകർ.
വിഭജനത്തിന്റെയും കശ്മീരിലേക്കുള്ള പാകിസ്താന്റെ അധിനിവേശവും വിവരിച്ചാണ് വീഡിയോ ആരംഭിക്കുന്നത്. രാജ ഹരിസിംഗിന്റെ ഭാരതത്തോടുള്ള താത്പര്യവും മുൻ പ്രധാനമന്ത്രി നെഹ്റു സുഹൃത്തായ ഷെയ്ഖ് അബ്ദുള്ളയോട് കാട്ടിയ സ്നേഹവും അതുകാരണം രാജ്യത്തിനുണ്ടായ നഷ്ടങ്ങളും പ്രൊലോഗിൽ പറയുന്നു. 70 വർഷം മുമ്പുള്ള തെറ്റുതിരുത്താൻ സമയമായിരിക്കുന്നു എന്നു പറഞ്ഞുകൊണ്ടാണ് 2.44 മിനിട്ട് ദൈർഘ്യമുള്ള വീഡിയോ അവസാനിക്കുന്നത്.
നവാഗതനായ ആദിത്യ സുഹാസ് ജാംബലെയാണ് സിനിമ സംവിധാനം ചെയ്തിരിക്കുന്നത്. ആർട്ടിക്കിൾ 370 പിൻവലിക്കാൻ കേന്ദ്രസർക്കാർ സ്വീകരിച്ച മുന്നൊരുക്കങ്ങളും ഇതിനായി രഹസ്യമായി താഴ്വരയിൽ പ്രവർത്തിച്ച സുരക്ഷാസേനയിലെ പ്രത്യേക ടീമിന്റെയും കഥയാണ് ചിത്രത്തിന്റെ ഇതിവൃത്തം. രാമായണം ടെലി സീരിയലിൽ ശ്രീരാമനെ അവതരിപ്പിച്ച അരുൺ ഗോവിൽ ചിത്രത്തിൽ പ്രധാനമന്ത്രി നരേന്ദ്രമോദിയായി എത്തുന്നു.
‘ഉറി ദ സർജിക്കല് സ്ട്രൈക്ക്’ സിനിമയുടെ സംവിധായകൻ ആദിത്യ ധാർ, മൊണാൽ താക്കർ എന്നിവർ ചേർന്നാണ് സിനിമയുടെ കഥയും തിരക്കഥയും ഒരുക്കിയിരിക്കുന്നത്. കുമാറിന്റെ വരികൾക്ക് ശാശ്വത് സച്ദേവാണ് സംഗീതം നൽകുന്നത്. ജ്യോതി ദേശ്പാണ്ഡെയ്ക്കൊപ്പം ആദിത്യ ധാർ, ലോകേഷ് ധാർ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്.