പിതുവർഷാരംഭം മുതൽ മലയാളത്തിൽ ഒരുപിടി മികച്ച ചിത്രങ്ങളാണ് ലഭിച്ചുകൊണ്ടിരിക്കുന്നത്. ജനുവരി പകുതിയോടെ എത്തിയ ഓസ്ലർ മികച്ച വിജയമാണ് ബോക്സ് ഓഫീസിൽ നേടിയത്. മോഹൻലാൽ- ലിജോ ജോസ് പെല്ലിശേരി ചിത്രം സമ്മിശ്ര പ്രതികരണങ്ങളാണ് നേടിയതെങ്കിലും പ്രേക്ഷകർക്ക് വമ്പൻ ദൃശ്യവിസ്മയമൊരുക്കി. ശേഷം ഫെബ്രുവരി ആദ്യവാരം തീയേറ്ററുകളിലെത്തിയ പ്രേമലു മികച്ച വിജയം നേടി. ഫെബ്രുവരി മാസത്തിൽ ഒരുപിടി ചിത്രങ്ങളാണ് റീലീസിനെത്തിയത്. മമ്മൂട്ടി ചിത്രം ഭ്രമയുഗമാണ് ഇതിലെ വമ്പൻ റിലീസ്. നിറഞ്ഞ സദസ്സിൽ പ്രദർശനം തുടരുകയാണ് ഭ്രമയുഗം. ഇപ്പോഴിതാ അക്കൂട്ടത്തിലേക്ക് മഞ്ഞുമ്മൽ ബോയ്സ് കൂടി എത്തിയിരിക്കുകയാണ്.
യുവതാരനിര അണിനിരക്കുന്ന ചിത്രം ഇന്ന് തിയേറ്ററുകളിലെത്തി. ആദ്യ ഷോ പിന്നിടുമ്പോൾ ചിത്രത്തിന് മികച്ച പ്രതികരണമാണ് നേടുന്നത്. ജാനേമൻ എന്ന ചിത്രത്തിന് ശേഷം ചിദംബരം സംവിധാനം ചെയ്യുന്ന ചിത്രം ഒരു സർവൈവൽ ത്രില്ലർ ജോണറിലാണ് ഒരുങ്ങിയിരിക്കുന്നത്. ചിത്രത്തിന്റേതായി പുറത്തുവന്ന ആദ്യ പോസ്റ്റർ മുതൽ വലിയ ഹൈപ്പാണ് ചിത്രത്തിന് നേടിക്കൊടുത്തത്. ഒരോ മേഖലയിലും ലോകോത്തരമികവ് അനുഭവപ്പെടുന്ന തരത്തിലാണ് സിനിമയുടെ മേക്കിംഗ്. സുഷിൻ ശ്യാമിന്റെ സംഗീതവും ശ്രദ്ധനേടുന്നുണ്ട്. തുടക്കം മുതൽ നേടിയ ഹൈപ്പ് അതുപോലെ തന്നെ നിലനിർത്താൻ ചിത്രത്തിന് സാധിച്ചു എന്ന് തന്നെ ഉറപ്പിക്കാം.
മലയാളത്തിൽ സർവൈവൽ ജോണറിൽ ഒരുങ്ങിയ ഒരു മികച്ച ചിത്രം തന്നെയാണെന്ന അഭിപ്രായം ആരാധകർക്കിടിയിൽ ഉയരുന്നുണ്ട്. ചിത്രത്തിന്റെ ഛായാഗ്രഹണവും പശ്ചാത്തല സംഗീതവും ശ്രദ്ധ നേടുകയാണ്. പ്രേമയുഗത്തിന്റെ കോമ്പറ്റീഷനൊപ്പം മഞ്ഞുമ്മൽ ബോയ്സിന് പിടിച്ചു നിൽക്കാൻ സാധിക്കുമെന്നും പ്രേക്ഷകർ ഉറപ്പു നൽകുന്നു. യഥാർത്ഥ സംഭവത്തെ ആസ്പദമാക്കി ഒരുങ്ങിയ ചിത്രം നൂറ് ശതമാനം തീയേറ്റർ എക്സ്പീരിയൻസ് ഉറപ്പുനൽകുന്നു. ഫ്രണ്ട്ഷിപ്പിന് പ്രധാന്യം നൽകി ഒരുക്കിയിരിക്കുന്ന ചിത്രം പ്രേക്ഷകനെ ത്രില്ലടിപ്പിച്ച് കടന്നു പോകുന്നു. അതേസമയം ഒറ്റ ദിവസത്തെ അഡ്വാൻസ് ബുക്കിംഗിലൂടെ മാത്രം ചിത്രം നേടിയത് ഒന്നര കോടിയ്ക്ക് അടുത്താണെന്നാണ് വിവരം. ഈ വർഷത്തെ മറ്റൊരു വിജയം കൂടി ഉറപ്പിക്കുകയാണ് ചിത്രം.
കൊച്ചിയിൽ നിന്നും വിനോദയാത്രക്കായി കൊടൈക്കനാലിൽ എത്തുന്ന ഒരു സംഘം യുവാക്കളെ ചുറ്റിപ്പറ്റി അവിടെ നടക്കുന്ന ചില സംഭവവികാസങ്ങളാണ് ചിത്രത്തിലൂടെ പറയുന്നത്. മഞ്ഞുമ്മൽ ബോയ്സിന്റെ ഛായാഗ്രഹണം നിർവഹിക്കുന്നത് ഷൈജു ഖാലിദാണ്. സൗബിൻ, ശ്രീനാഥ് ഭാസി, ബാലു വർഗീസ്, ഗണപതി, ലാൽ ജൂനിയർ, അരുൺ കുര്യൻ തുടങ്ങി യുവ താരനിരയാണ് ചിത്രത്തിൽ കേന്ദ്രകഥാപാത്രങ്ങളായി എത്തുന്നത്.
