ബോളിവുഡ് നായിക കങ്കണ റണാവത്തിന്റെ ശ്രദ്ധേയമായ ചിത്രങ്ങളിലൊന്നാണ് ക്വീൻ. 2013 ലാണ് ചിത്രം പ്രദർശനത്തിനെത്തിയത്. ചിത്രത്തിന് ഇപ്പോഴും നിരവധി ആരാധകരുണ്ട്. വികാസ് ബഹൽ സംവിധാനം ചെയ്ത ക്വീൻ സിനിമയുടെ രണ്ടാം ഭാഗത്തെ സംബന്ധിച്ച വാർത്തകൾ അടുത്തിടെ പുറത്തുവന്നിരുന്നു. സംവിധായകനും അണിയറ പ്രവർത്തകരും ഇക്കാര്യം ശരിവക്കുകയും ചെയ്തിരുന്നു. ഇപ്പോഴിതാ രണ്ടാം ഭാഗത്തിന്റെ തിരക്കഥ പൂർത്തിയായെന്ന വാർത്ത പങ്കുവച്ചിരിക്കുകയാണ് സംവിധായകൻ.
വികാസ് ബഹൽ സംവധാനം ചെയ്യുന്ന ഏറ്റവും പുതിയ ചിത്രമായ ശെത്താന്റെ പ്രമോഷൻ പരിപാടിക്കിടെയാണ് അദ്ദേഹം ഇക്കാര്യം അറിയിച്ചത്. ‘ ക്വീൻ റിലീസ് ചെയ്തതത് 10 വർഷം മുമ്പാണ്, എന്നാൽ ഇപ്പോഴും എന്നോട് എല്ലാവരും ആദ്യം ചോദിക്കുന്നത് ക്വീൻ സിനിമയെ പറ്റിയാണ്. അതിലൂടെ എനിക്ക് ആരാധകരുടെ വലിയൊരു സ്നേഹവും പിന്തുണയുമാണ് ലഭിക്കുന്നത്. അതുതന്നെയാണ് ചിത്രത്തിന്റെ രണ്ടാം ഭാഗത്തെ കുറിച്ച് എന്നെ ചിന്തിപ്പിച്ച കാരണവും’.
‘ ആരാധകരോട് ഞാൻ വളരെ സന്തോഷത്തോടെ അറിയിക്കുകയാണ് ക്വീൻ രണ്ടാം ഭാഗത്തിന്റെ തിരക്കഥ പൂർത്തിയായിരിക്കുന്നു. നിങ്ങളുടെ പ്രിയനായിക കങ്കണ ഉടൻതന്നെ റാണിയായി മുന്നിലെത്തും. നേരത്തെ സാമ്പത്തികമായ ബുദ്ധിമുട്ടുകളൊക്കെ വെല്ലുവിളികളായി മുന്നിലുണ്ടായിരുന്നു ഇപ്പോൾ അതെല്ലാം മാറിയിരിക്കുന്നു’. വികാസ് ബഹൽ പറഞ്ഞു. വിവാഹം മുടങ്ങിയതിനെ തുടർന്ന് റാണിയെന്ന പെൺകുട്ടി ഫ്രാൻസിലേക്ക് തന്റെ ഹണിമൂൺ യാത്രക്ക് തനിച്ച് പോകുന്നതാണ് ക്വീൻ ചിത്രത്തിന്റെ കഥാഗതി. രാജ്കുമാർ റാവു ആയിരുന്നു ചിത്രത്തിൽ നായകനായി എത്തിയത്.