ടോൾ പ്ലാസയിലെ തിരക്ക് നിയന്ത്രിക്കുക എന്നത് ലക്ഷ്യം വച്ച് രൂപം നൽകിയ പദ്ധതിയാണ് ഒരു വാഹനം ഒരു ഫാസ്ടാഗ്. നാഷണൽ ഹൈവേയ്സ് അതോറിറ്റി ഓഫ് ഇന്ത്യയാണ് ഇതിന് രൂപം നൽകിയത്. ഒന്നിലധികം വാഹനങ്ങൾക്ക് ഒരു ഫാസ്ടാഗ് ഉപയോഗിക്കുന്നുവെന്ന് കണ്ടെത്തിയതിന്റെ പശ്ചാത്തലത്തിലാണ് പുതിയ നീക്കം. ഇതിനോടനുബന്ധിച്ച് ഫെബ്രുവരി 29-ഓടെ ഫാസ്ടാഗിൽ കെവൈസി പൂർത്തിയാക്കണം
മുമ്പ് ജനുവരി 31-ആയിരുന്നു ഇതിനായി അനുവദിച്ച അവസാന തീയതി. എന്നാൽ ഇത് പിന്നീട് ഫെബ്രുവരി 29-ലേക്ക് നീട്ടുകയായിരുന്നു. ഇന്ന് കെവൈസി പൂർത്തിയാക്കുന്നതിനുള്ള സമയം അവസാനിക്കാനിരിക്കെ പലർക്കും ഇതിനെക്കുറിച്ച് ധാരണയുണ്ടാകില്ല. ഇതിലേക്ക് വിവരങ്ങൾ എങ്ങനെ നൽകാമെന്ന് നോക്കാം..
എൻഎച്ച്എഐയുടെ വെബ്സൈറ്റിലൂടെയും ഫാസ്ടാഗ് നൽകിയ ബാങ്കിന്റെ വെബ്സൈറ്റ് മുഖേനയും കെവൈസി പൂർത്തിയാക്കാവുന്നതാണ്. https://fastag.ihmcl.com/ എന്ന എൻഎച്ച്എഐ വെബ്സൈറ്റിൽ നിങ്ങളുടെ മൊബൈൽ നമ്പർ നൽകി ലോഗ് ഇൻ ചെയ്യുക. തുടർന്ന് മൈ പ്രൊഫൈൽ എന്ന ടാബിൽ ക്ലിക്ക് ചെയ്ത് കെവൈസി എന്ന ഓപ്ഷൻ തിരഞ്ഞെടുക്കുക. ആവശ്യമായ രേഖകൾ നൽകി നടപടിക്രമങ്ങൾ പൂർത്തിയാക്കണം. പാസ്പോർട്ട്, ഡ്രൈവിംഗ് ലൈസൻസ്, വോട്ടർ ഐഡി, പാൻകാർഡ്, ആധാർ, ആർസി എന്നീ രേഖകളാണ് സമർപ്പിക്കേണ്ടത്.
മൈ പ്രൊഫൈൽ ടാബിലുള്ള കെവൈസി സ്റ്റാറ്റസ് എന്ന ഓപ്ഷനിൽ നിന്നും നിലവിലെ അപ്ഡേറ്റ് അറിയാനാകും. ഓൺലൈൻ മുഖേന ചെയ്യാൻ സാധിക്കാത്തവർക്ക് അതത് ബാങ്കുകളിലെത്തിയും നടപടി പൂർത്തിയാക്കാവുന്നതാണ്.
