മലയാളികൾ ഏറെ ആവേശത്തോടെ കാത്തിരിക്കുന്ന ചിത്രമാണ് എമ്പുരാൻ. നടൻ പൃഥ്വിരാജ് സംവിധാനം ചെയ്യുന്ന ചിത്രത്തിന്റെ ഏറ്റവും പുതിയ അപ്ഡേറ്റ് പുറത്തുവന്നു. ചിത്രത്തിന്റെ മൂന്നാം ഷെഡ്യൂൾ പൂർത്തിയായിരിക്കുകയാണ്. സമൂഹമാദ്ധ്യമങ്ങളിലൂടെ അണിയറ പ്രവർത്തകർ തന്നെയാണ് ഇക്കാര്യം അറിയിച്ചത്. ജനുവരി പകുതിയോടെയായിരുന്നു ചിത്രത്തിന്റെ മൂന്നാം ഷെഡ്യൂൾ അമേരിക്കയിൽ ആരംഭിച്ചത്. എമ്പുരാനിലെ നിർണായ രംഗങ്ങളാണ് ഇവിടെ ചിത്രീകരിച്ചത്. ടോവിനൊ, ഇന്ദ്രജിത്ത് എന്നിവരടക്കമുള്ള താരങ്ങളും മൂന്നാം ഷെഡ്യൂളിൽ ജോയിൻ ചെയ്തിരുന്നു.
അമേരിക്കയിലെ ചിത്രീകരണത്തിനിടെയുള്ള ചിത്രങ്ങളും വീഡിയോകളും സമൂഹമാദ്ധ്യമങ്ങളിലടക്കം ശ്രദ്ധ നേടിയിരുന്നു. വൻ ബജറ്റിൽ ഒരുങ്ങുന്ന സിനിമയുടെ ആദ്യഘട്ട ചിത്രീകരണം നടന്നത് ലഡാക്കിലായിരുന്നു. രണ്ടാം ഘട്ടം യുകെയിലും നടന്നു. കേരളത്തിലെ രംഗങ്ങളടക്കം ചിത്രീകരിക്കാനുണ്ട്. ചെന്നൈയിലും ചിത്രീകരണം നടക്കുമെന്നാണ് വിവരം.
എമ്പുരാന്റെ ആദ്യ ഭാഗമായ ലൂസിഫറിന് നൽകിയതിനേക്കാൾ ഏറെ പ്രതീക്ഷയാണ് ആരാധകർ ചിത്രത്തിന് നൽകിയിരിക്കുന്നത്. സ്വന്തമായി ജെറ്റ് വിമാനവും കൊട്ടാരങ്ങളുമുള്ള കോടീശ്വരന്റെ കഥായാണ് എമ്പുരാനിൽ പറയാൻ പോകുന്നതെന്ന് അടുത്തിടെ ഒരു അഭിമുഖത്തിൽ മോഹൻലാൽ പറഞ്ഞിരുന്നു. അബ്റാം ഖുറേഷി എന്ന കഥാപാത്രത്തെ കുറിച്ചുള്ള സൂചന മാത്രമായിരുന്നു അത്.
