ഹൈദരാബാദ്: തെലങ്കാനയിലെ മേഡ്ചൽ മാൽകാജ്ഗിരിയിൽ റോഡ്ഷോ നടത്തി പ്രധാനമന്ത്രി നരേന്ദ്രമോദി. മിർജാൽഗുഡ മുതൽ മൽകാജ്ഗിരി ക്രോസ് റോഡ് വരെയാണ് റോഡ് ഷോ നടന്നത്. കുട്ടികളും സ്ത്രീകളുമടക്കം നിരവധി ജനങ്ങളാണ് പ്രധാനമന്ത്രിയെ സ്വീകരിക്കാൻ നഗരവീഥിയിൽ തടിച്ചുകൂടിയത്. വരുന്ന ലോക്സഭാ തിരഞ്ഞെടുപ്പിന് മുന്നോടിയായി തെലങ്കാനയിൽ സംഘടിപ്പിച്ച ബിജെപിയുടെ പ്രചാരണത്തിനായി എത്തിയതായിരുന്നു അദ്ദേഹം.
ബിജെപി സംസ്ഥാന അദ്ധ്യക്ഷനും സെക്കന്തരാബാദ് ലോക്സഭാ സ്ഥാനാർത്ഥിയുമായ ജി കിഷൻ റെഡി, ബിജെപിയുടെ മൽകാജ്ഗിരി സ്ഥാനാർത്ഥി എടല രാജേന്ദർ, ബിജെപി വൈസ് പ്രസിഡന്റ് ഡോ. കെ ലക്ഷ്മൺ തുടങ്ങിയവരും പ്രധാനമന്ത്രിക്കൊപ്പം റോഡ് ഷോയിൽ പങ്കെടുത്തു. ലോക്സഭാ തിരഞ്ഞെടുപ്പിന് മുന്നോടിയായി 16ാം തീയതി നാഗർകുർണൂലിലും 18ാം തീയതി ജഗ്തിയലിലും സംഘടിപ്പിക്കുന്ന പൊതു യോഗങ്ങളെയും പ്രധാനമന്ത്രി അഭിസംബോധന ചെയ്യും.
