ന്യൂഡൽഹി: ഡൽഹി മദ്യനയ കുംഭകോണക്കേസിൽ നിർണായക വെളിപ്പെടുത്തലുമായി ഇഡി. ഡൽഹി മുഖ്യമന്ത്രി അരവിന്ദ് കെജ്രിവാളുമായും മനീഷ് സിസോദിയയുമായും അറസ്റ്റിലായ ബിആർഎസ് നേതാവ് കെ കവിത ഗൂഢാലോചന നടത്തിയിരുന്നതായി ഇഡി കണ്ടെത്തി. ഇതിനായി 100 കോടി രൂപ ഇവർ കൈമാറിയെന്നും ഇഡി വ്യക്തമാക്കി.
ഈ മാസം 15-നാണ് ഇഡി കവിതയെ അറസ്റ്റ് ചെയ്തത്. ഹൈദരാബാദിലെ കവിതയുടെ വസതിയിൽ ഇഡി ഉദ്യോഗസ്ഥർ നടത്തിയ പരിശോധനക്ക് ശേഷമാണ് അറസ്റ്റ് രേഖപ്പെടുത്തിയത്. മാർച്ച് 23 വരെ കവിത ഇഡിയുടെ കസ്റ്റഡിലായിരിക്കും.
ഡൽഹി മദ്യനയം രൂപീകരിക്കുന്നതിലും നടപ്പാക്കുന്നിതിലും ക്രമക്കേട് നടത്തിയതായും ഇതിനായി എഎപി ഉന്നത നേതാക്കളുമായി കവിത ഗൂഡാലോചന നടത്തിയതായും ഇഡി അന്വേഷണത്തിൽ കണ്ടെത്തി. കള്ളപ്പണം വെളുപ്പിക്കൽ ഉൾപ്പെടെയുളള അഴിമതികൾ ഇഡി കണ്ടെത്തിയിരുന്നു. 2021-22 ലെ ഡൽഹി മദ്യനയ അഴിമതി കേസിലെ ദക്ഷിണേന്ത്യൻ ലോബിയുമായി കവിതയ്ക്ക് ബന്ധമുണ്ടെന്നും ഇഡി വ്യക്തമാക്കി.