പത്തനംതിട്ട: കടമ്പനാട് വില്ലേജ് ഓഫീസർ ആത്മഹത്യ ചെയ്ത സംഭവത്തിൽ കുടുംബം ജില്ലാ പോലീസ് മേധാവിക്ക് പരാതി നൽകി. മണ്ണെടുപ്പുമായി ബന്ധപ്പെട്ട് വില്ലേജ് ഓഫീസിൽ നിരവധി പ്രശ്നങ്ങൾ നിലനിന്നിരുന്നുവെന്നും പ്രാദേശിക നേതാക്കളടക്കം മനോജിനെ ഭീഷണിപ്പെടുത്തിയിരുന്നെന്നും ചൂണ്ടിക്കാട്ടിയാണ് കുടുംബം പരാതി നൽകിയത്. സംഭവത്തിൽ സമഗ്ര അന്വേഷണം നടത്തുമെന്ന് എസ്പി ഉറപ്പ് നൽകിയതായി മനോജിന്റെ സഹോദരൻ പറഞ്ഞു.
മണ്ണെടുപ്പ് രൂക്ഷമായ പ്രദേശമാണ് കടമ്പനാട്. ഇവിടേക്ക് മൂന്ന് മാസം മുമ്പ് സ്ഥലം മാറി വന്നത് മുതൽ മനോജ്, പ്രാദേശിക സിപിഎം നേതാക്കളിൽ നിന്നും കടുത്ത മാനസിക സമ്മർദ്ദം അനുഭവിച്ചിരുന്നതായി കുടുംബം ആരോപിച്ചിരുന്നു. ആത്മഹത്യയ്ക്ക് ഒരാഴ്ച മുമ്പ് മനോജിനെ സിപിഎം പ്രദേശിക നേതാക്കൾ പരസ്യമായി ഭീഷണിപ്പെടുത്തുകയും അധിക്ഷേപിക്കുകയും ചെയ്തെന്നും പരാതിയിൽ പറയുന്നുണ്ട്. കഴിഞ്ഞ 11ാം തീയതിയാണ് മനോജിനെ കിടപ്പുമുറിക്കുള്ളിൽ തൂങ്ങി മരിച്ച നിലയിൽ കണ്ടെത്തിയത്.