വഴിയോരങ്ങളിൽ ചില്ലുകുപ്പിക്കകത്ത് പച്ചമുളകിനൊപ്പം ഉപ്പുവെള്ളത്തിൽ മുങ്ങിയിരിക്കുന്ന പൈനാപ്പിൾ കഷ്ണങ്ങൾ കഴിക്കാൻ ഇഷ്ടമുള്ളവരായിരിക്കും നമ്മിൽ ബഹുഭൂരിപക്ഷവും. എന്നാൽ മൊത്തത്തിലൊരു കൈതച്ചക്ക ചെത്താനുള്ള മടിയുള്ളവരും നമുക്കിടയിൽ കൂടുതലാണ്. ചെത്തിയെടുക്കാനുള്ള ബുദ്ധിമുട്ട് കാരണം തന്നെ പലപ്പോഴും അവഗണിക്കപ്പെടുന്ന ഒരു ഫലവർഗം കൂടിയാണ് കൈതച്ചക്ക. എന്നാൽ നിരവധി ആരോഗ്യഗുണങ്ങളാണ് കൈതച്ചക്കയിൽ അടങ്ങിയിരിക്കുന്നത്.
ഭാരം നിയന്ത്രിച്ച് നിർത്തി ദഹനപ്രശ്നങ്ങൾ അകറ്റുന്നതിന് പൈനാപ്പിൾ കഴിക്കുന്നത് നല്ലതാണ്. കാൻസർ പോലുള്ള രോഗങ്ങളെയടക്കം ചെറുത്ത് നിർത്താൻ കഴിവുള്ള പോഷക ഘടകങ്ങളാണ് കൈതച്ചക്കയിൽ അടങ്ങിയിരിക്കുന്നത്. വിറ്റാമിൻ സിയും വിറ്റാമിൻ എയും ധാരാളം അടങ്ങിയിട്ടുള്ളതിനാൽ തന്നെ ഇത് കണ്ണുകളുടെ ആരോഗ്യത്തിനും ചർമ്മത്തിന് നിറം വർദ്ധിപ്പിക്കുന്നതിനും സഹായിക്കുന്നു.
ജ്യൂസായിട്ടും, ജാമായിട്ടും ഇതൊന്നും അല്ലാതെയും പൈനാപ്പിൾ നാം കഴിക്കാറുണ്ട്. എന്നാൽ ചട്നി അരച്ച് കഴിച്ചിട്ടുണ്ടോ? എങ്കിൽ ഇതൊന്ന് പരീക്ഷിച്ചു നോക്കിക്കോളൂ..
ചേരുവകൾ
പൈനാപ്പിൾ- 1
പഞ്ചസാര- 1/4 കപ്പ്
വിനാഗിരി- 3,4 സ്പൂൺ
ഉപ്പ് – ആവശ്യത്തിന്
മുളകുപൊടി- 1/2 ടീസ്പൂൺ
വറുത്ത ജീരകം- 2 ടീസ്പൂൺ
മഞ്ഞൾപൊടി- കാൽ ടീസ്പൂൺ
കുരുമുളകുപൊടി- കാൽ ടീസ്പൂൺ
തയ്യാറാക്കുന്ന വിധം
പൈനാപ്പിൾ തൊലികളയാതെ നന്നായി ചുട്ടെടുക്കുക. ചൂട് മാറിയ ശേഷം ഇതിന്റെ തൊലി ചെത്തിയെടുത്ത് ചെറുതായി അരിഞ്ഞെടുക്കുക. ഒരു പാൻ ചൂടാക്കി അതിലേക്ക് പഞ്ചസാരയും പൈനാപ്പിളും ചേർത്ത് നന്നായി ഇളക്കിയ ശേഷം വിനാഗിരി ചേർത്ത് കൊടുക്കുക. മഞ്ഞൾപൊടിയും, ഉപ്പും, മുളകുപൊടിയും ചേർത്ത ശേഷം ഇതിലേക്ക് വറുത്ത ജീരകവും കുരുമുളക് പൊടിയും ഇടുക. ഇവയെല്ലാം നന്നായി വേവിച്ചെടുക്കുക. തുടർന്ന് ചൂട് മാറിയതിന് ശേഷം ഒരു മിക്സിയിലിട്ട് അടിച്ചെടുക്കുക. സ്വാദിഷ്ടമായ പൈനാപ്പിൾ ചട്നി റെഡി!
