പിറന്നാൾ ദിനത്തിൽ തിരുപ്പതി ക്ഷേത്രത്തിൽ ദർശനം നടത്തി നടി ജാൻവി കപൂർ. കാമുകന്‍ ശിഖര്‍ പഹാരിക്കും സുഹൃത്തും സോഷ്യൽമീഡിയ ഇൻഫ്ലുവൻസറുമായ ഓറിക്കും ഒപ്പമാണ് ജാൻവി ക്ഷേത്രത്തിൽ ദർശനത്തിനെത്തിയത്. ജാന്‍വി മുട്ടുകുത്തി ക്ഷേത്ര പടികള്‍ കയറുന്ന വീഡിയോ ഓറി പങ്കുവച്ചിരുന്നു.
മാർച്ച് ആറിനായിരുന്നു ജാൻവി കപൂറിന്റെ ജന്മദിനം. അന്നേദിവസം ക്ഷേത്രദർശനം നടത്തിയതിന്റേയും കേക്ക് മുറിച്ച് ആഘോഷിച്ചതിന്റെയും വീഡിയോ കഴിഞ്ഞ ദിവസമാണ് ഓറി യൂട്യൂബിൽ പങ്കുവച്ചത്.
മൂവരും നാല് മണിക്കൂർ സമയമെടുത്തായിരുന്നു 3,550 പടിക്കെട്ടുകൾ താണ്ടി മലമുകളിലെത്തിയത്. അവസാനത്തെ പടിക്കെട്ടുകൾ മുട്ടുകുത്തി ഇഴഞ്ഞ് ക്ഷേത്രനടയിലെത്തുന്ന ജാൻവിയെ വീഡിയോയിൽ കാണാം. ക്ഷേത്ര ദർശനത്തിന് ശേഷം തിരിച്ചുപോകുന്നതിനിടെ വിമാനത്തിൽ വച്ചായിരുന്നു ജാൻവിയുടെ പിറന്നാളാഘോഷം.
ജാൻവി കപൂറിന്റെ അമ്മ ശ്രീദേവിക്ക് ഏറെ പ്രിയപ്പെട്ട സ്ഥലങ്ങളിലൊന്നാണ് തിരുപ്പതി. ഇതിന് മുമ്പും നിരവധി തവണ തിരുപ്പതി ക്ഷേത്രത്തിൽ ജാൻവി ദർശനം നടത്തിയിട്ടുണ്ട്. ബാലാജിയെ ദർശിക്കാനും പ്രാർത്ഥിക്കാനുമായി ഏകദേശം 50 തവണയെങ്കിലും മുട്ടിലിഴഞ്ഞ് പടികൾ ചവിട്ടി ക്ഷേത്രത്തിൽ എത്തിയിട്ടുണ്ടെന്ന് ജാൻവി പറയുന്നു.
