ഹൈദരബാദ്: തെലുങ്ക് യുവതാരം നവീൻ പൊളിഷെട്ടിക്ക് വാഹനാപകടത്തിൽ പരിക്ക്. യുഎസിൽ വച്ച് നവീൻ സഞ്ചരിച്ചിരുന്ന ബൈക്ക് നിയന്ത്രണം നഷ്ടപ്പെട്ട് മറിയുകയായിരുന്നു. കുറച്ച് ദിവസങ്ങൾക്ക് മുമ്പ് യുഎസിലെ ഡാളസിൽ വച്ചായിരുന്നു അപകടം സംഭവിച്ചത്. അപകടത്തിൽ നവീനിന്റെ കൈകൾക്ക് പരിക്കേറ്റിരുന്നു.
ഇതുസംബന്ധിച്ച് നേരത്തെ തന്നെ വാർത്തകൾ പുറത്തുവന്നിരുന്നെങ്കിലും നടന്റെ ടീം ഇപ്പോഴാണ് അപകടവാർത്ത സ്ഥിരീകരിച്ചത്. അനുഷ്ക ഷെട്ടി പ്രധാന വേഷത്തിൽ അഭിനയിച്ച മിസ് ഷെട്ടി മിസ്റ്റർ പൊളി ഷെട്ടിയാണ് നവീൻ ഒടുവിൽ അഭിനയിച്ച സിനിമ. ശ്രീലീലയ്ക്കൊപ്പം കല്യാൺ ശങ്കർ സംവിധാനം ചെയ്യുന്ന ചിത്രത്തിലാണ് താരം ഇപ്പോൾ അഭിനയിക്കുന്നത്. 2019ലാണ് നവീൻ പൊളിഷെട്ടി സിനിമാ മേഖലയിൽ സജീവമായത്. തിരക്കഥാകൃത്ത് കൂടിയാണ് നവീൻ.