ദുബായിലെ മാഡം തുസാഡ്സ് മ്യൂസിയത്തിൽ തന്റെ മെഴുക് പ്രതിമ അനാശ്ചാദനം ചെയ്ത് തെലുങ്ക് സൂപ്പർതാരം അല്ലു അർജുൻ. പ്രതിമ അനാശ്ചാദനം ചെയ്ത വിവരം അല്ലു അർജുൻ തന്നെയാണ് സമൂഹമാദ്ധ്യമങ്ങളിലൂടെ പങ്കുവച്ചത്. തന്റെ മെഴുക് പ്രതിമയ്ക്കൊപ്പമുള്ള ചിത്രവും ഒരു കുറിപ്പും അല്ലു അർജുൻ പങ്കുവച്ചു.
‘ മാഡം തുസാഡ്സ് വാക്സ് മ്യൂസിയത്തിൽ നടന്ന മെഴുക് പ്രതിമകളുടെ അനാശ്ചാദന ചടങ്ങിൽ പങ്കെടുത്തു. ഒരു നടനെന്ന നിലയിൽ വളരെ അവിസ്മരണീയമായ നിമിഷമായിരുന്നു അത്’. അല്ലു അർജുൻ കുറിച്ചു. പിൻതിരിഞ്ഞ് നിൽക്കുന്ന പ്രതിമയ്ക്കൊപ്പമുള്ള ചിത്രമാണ് അല്ലു അർജുൻ പങ്കുവച്ചത്. നടന്റെ ഹിറ്റ് ചിത്രമായ അങ്ങ് വൈകുണ്ഡപുരത്ത് എന്ന സിനിമയുടെ ലുക്കിലുള്ള മെഴുക് പ്രതിമയാണ് നിർമ്മിച്ചിരിക്കുന്നത്.
കുറച്ച് മാസങ്ങൾക്ക് മുമ്പ്, മാഡം തുസാഡ്സിന്റെ ഔദ്യോഗിക എക്സ് പേജിൽ നടന്റെ മെഴുക് പ്രതിമ നിർമ്മിക്കുന്നത് സംബന്ധിച്ച ഒരു വീഡിയോ പങ്കുവച്ചിരുന്നു. പ്രതിമ നിർമ്മാണത്തിന് അളവെടുക്കുന്നതിനും കണ്ണുകൾ തിരഞ്ഞെടുക്കുന്നതിനുമായിട്ടാണ് താരം മ്യൂസിയത്തിലെത്തിയത്. കഴിഞ്ഞ വർഷം അവസാനത്തോടെ നടന്റെ അടക്കമുള്ള 200ഓളം മെഴുക് പ്രതിമകൾ അനാശ്ചാദനം ചെയ്യുനമെന്ന്് അറിയിച്ചിരുന്നെങ്കിലും ഇത് വൈകുകയായിരുന്നു.
മാഡം തുസാഡ്സ് വാക്സ് മ്യൂസിയത്തിൽ ഇടം പിടിക്കുന്ന മൂന്നാമത്തെ തെന്നിന്ത്യൻ താരമാണ് അല്ലു അർജ്ജുൻ. ബാഹുബലി ലുക്കിൽ പ്രഭാസും, സ്പൈഡർ സിനിമയിലെ ലുക്കിൽ മഹേഷ് ബാബുവുമാണ് വാക്സ് മ്യൂസിയത്തിലെ മറ്റ് താരങ്ങൾ. അമിതാഭ് ബച്ചൻ, ഐശ്വര്യ റായ്, ഷാരൂഖ് ഖാൻ, ഹൃത്വിക് റോഷൻ, പ്രിയങ്ക ചോപ്ര, ദീപിക പദുക്കോൺ, സൽമാൻ ഖാൻ, കരീന കപൂർ തുടങ്ങിയ ഇന്ത്യൻ താരങ്ങളുടെ മെഴുക് രൂപങ്ങളും മ്യൂസിയത്തിൽ പ്രദർശിപ്പിച്ചിട്ടുണ്ട്.
