മഞ്ഞുമ്മൽ ബോയ്സ് സിനിമാ ടീമിന് അഭിനന്ദനവുമായി തലൈവർ രജനീകാന്ത്. കഴിഞ്ഞ ദിവമാണ് രജനീകാന്ത് മഞ്ഞുമ്മൽ ബോയ്സിന്റെ സ്പെഷ്യൽ ഷോ കണ്ടത്. പിന്നാലെ സംവിധാനയകൻ ചിദംബരത്തെയും താരങ്ങളെയും ചെന്നൈയിലെ തന്റെ വസതിയിലേക്ക് ക്ഷണിക്കുകയായിരുന്നു. തലൈവർക്കൊപ്പമുള്ള മഞ്ഞുമ്മൽ ബോയ്സ് ടീമിന്റെ ചിത്രങ്ങൾ സമൂഹമാദ്ധ്യമങ്ങളിൽ വൈറലാവുകയാണ്.
ബോക്സോഫീസിൽ ചിത്രം 200 കോടിക്ക് മുകളിൽ കളക്ഷൻ നേടിക്കഴിഞ്ഞു. കേരളത്തിന് പുറമേ തമിഴ്നാട്ടിലും ചിത്രം വലിയ കളക്ഷനാണ് നേടിയത്. ചിത്രം തമിഴകത്ത് ഇപ്പോഴും ട്രെൻഡിംഗ് ആണ്. റിലീസിന് പിന്നാലെ ആശംസാ പ്രവാഹം തന്നെയാണ് മഞ്ഞുമ്മൽ ടീം നേടിയത്. ഫെബ്രുവരി 22-ന് തിയേറ്ററിലെത്തിയ ചിത്രം മൗത്ത് പബ്ലിസിറ്റിയിലൂടെയാണ് മുന്നേറിയത്.
സംവിധായകൻ ചിദംബരം, നടൻമാരായ ഗണപതി, ചന്തു സലിംകുമാർ, ദീപക് പറമ്പോൾ, അരുൺ കുര്യൻ എന്നിവരാണ് രജനികാന്തിനെ സന്ദർശിച്ചത്. മഞ്ഞുമ്മൽ ബോയ്സ് ചിത്രത്തിന്റെ ഔദ്യോഗിക സോഷ്യൽ മീഡിയ അക്കൗണ്ടുകളിൽ തലൈവർക്കൊപ്പമുള്ള ചിത്രങ്ങൾ പങ്കുവച്ചിട്ടുണ്ട്. ‘നന്ദി സൂപ്പർസ്റ്റാ ആർ’ എന്ന കുറിപ്പോടെയാണ് ചിത്രം പങ്കുവച്ചത്.
തമിഴ് സിനിമാ മേഖലയിൽ നിന്ന് നിരവധി താരങ്ങൾ നേരത്തെ മഞ്ഞുമ്മൽ ടീമിന് ആശംസകളുമായി എത്തിയിരുന്നു. നടൻമാരായ കമൽഹാസൻ, ചിമ്പു, വിക്രം തുടങ്ങിയവർ നേരിട്ടാണ് ടീമിന് അഭിനന്ദനം അറിയിച്ചത്. ഇതുവരെയുള്ള റെക്കോർഡുകൾ തകർത്ത മഞ്ഞുമ്മൽ ബോയ്സ് ഇപ്പോഴും മികച്ച കളക്ഷൻ നേടി മുന്നേറുകയാണ്. ഇതിനിടെ ചിത്രത്തിന്റെ ഒടിടി റിലീസും പ്രഖ്യാപിച്ചു. ഏപ്രിൽ 5ന് സിനിമ ഒടിടിയിൽ എത്തും.
സൗബിൻ ഷാഹിർ, ശ്രീനാഥ് ഭാസി, ബാലു വർഗീസ്, ഗണപതി, ലാൽ ജൂനിയർ, ചന്തു സലീംകുമാർ, അഭിറാം രാധാകൃഷ്ണൻ, ദീപക് പറമ്പോൽ, ഖാലിദ് റഹ്മാൻ, അരുൺ കുര്യൻ, വിഷ്ണു രഘു എന്നിവരാണ് ചിത്രത്തിലെ പ്രധാന താരങ്ങൾ. പറവ ഫിലിംസിന്റെ ബാനറിൽ സൗബിൻ ഷാഹിർ, ബാബു ഷാഹിർ, ഷോൺ ആന്റണി എന്നിവർ ചേർന്നാണ് ചിത്രത്തിന്റെ നിർമ്മാണം.