മലയാളികളുടെ സ്വന്തം മല്ലു അർജ്ജുനാണ് അല്ലു അർജ്ജുൻ. ടോളിവുഡ് സിനിമാ ലോകത്തെ സ്റ്റൈലിഷ് സ്റ്റാർ അല്ലു അർജ്ജുനെ മലയാളക്കര ഏറ്റെടുത്തത് വളരെ പെട്ടന്നായിരുന്നു. ഇന്ന് അദ്ദേഹത്തിന്റെ 42-ാം ജന്മ വാർഷികം ആഘോഷിക്കുന്ന വേളയിൽ പുറത്തുവന്ന ഒരു വീഡിയോയാണ് ഇപ്പോൾ ആരാധകർ ഏറ്റെടുത്തിരിക്കുന്നത്.
പിറന്നാൾ ദിനത്തിൽ അല്ലു അർജ്ജുനെ കാണാനായി നിരവധി ആരാധകരാണ് തിക്കും തിരക്കും കൂട്ടി അദ്ദേഹത്തിന്റെ വസതിയ്ക്ക് മുന്നിൽ എത്തിയത്. ജോഗർ പ്രിന്റഡ് ഷർട്ട് ധരിച്ചെത്തിയ അല്ലു അർജ്ജുൻ ആരാധകരുടെ മുന്നിൽ എത്തുകയും അവരുടെ സ്നേഹപ്രകടനങ്ങൾക്ക് നന്ദി അറിയിക്കുകയും ചെയ്തു. ‘സ്റ്റാർ പുഷ്പ’ എന്ന് ഉറക്കെ വിളിച്ചായിരുന്നു അല്ലു അർജ്ജുനെ ആരാധകർ വരവേറ്റത്.
പുഷ്പ 2-നായുള്ള കാത്തിരിപ്പിലാണ് സിനിമാ ലോകം. ആദ്യ ഭാഗത്തിന്റെ അതേ ആവേശമാണ് രണ്ടാം ഭാഗത്തിനും ആരാധകർ നൽകിയിരിക്കുന്നത്. സിനിമയുടെ ചിത്രീകരണം അവസാനഘട്ടത്തിൽ എത്തിയപ്പോൾ അടുത്തിടെ സിനിമയുടെ രണ്ട് ക്യാരക്ടർ പോസ്റ്ററുകൾ അണിയറ പ്രവർത്തകർ പുറത്തുവിട്ടിരുന്നു. നായികയായ രശ്മിക മന്ദാനയുടെ പിറന്നാൾ ദിനത്തോടനുബന്ധിച്ചായിരുന്നു ആദ്യ ക്യാരക്ടർ പോസ്റ്റർ പുറത്തുവിട്ടത്. ഇപ്പോൾ അല്ലു അർജ്ജുന്റെ ജന്മദിനത്തോടനുബന്ധിച്ച് സിനിമയുടെ ടീസറും അണിയറ പ്രവർത്തകർ പങ്കുവച്ചിട്ടുണ്ട്. മികച്ച പ്രതികരണങ്ങളാണ് ടീസറിന് ഇതിനോടകം ലഭിച്ചത്.
