ഇന്ത്യയിലെ ആദ്യ സ്വകാര്യ നിർമ്മിത സബ് മീറ്റർ റെസല്യൂഷൻ നിരീക്ഷണ ഉപഗ്രഹം വിക്ഷേപിച്ച് ടാറ്റ അഡ്വാൻസ്ഡ് സിസ്റ്റംസ് ലിമിറ്റഡ് എന്ന ടാറ്റ കോ. ഇലോൺ മസ്കിന്റെ ഉടമസ്ഥതയിലുള്ള സ്പേസ് എക്സ് ഫാൽക്കൺ 9 റോക്കറ്റിന്റെ ചിറകേറിയാണ് ടിസാറ്റ്-1 എന്ന ഉപഗ്രഹം കുതിച്ചത്. ഫ്ലോറിഡയിലെ കെന്നഡി സ്പേസ് സെന്ററിൽ നിന്നായിരുന്നു വിക്ഷേപണം.
ഹൈ റെസല്യൂഷൻ സാറ്റലൈറ്റ് ചിത്രങ്ങൾ നൽകുന്നതിൽ ലോകത്തിലെ തന്നെ മുൻിര ദാതാക്കളായ സാറ്റലോജിക്കുമായി സഹകരിച്ചാണ് ടിഎഎസ്എൽ വിക്ഷേപണം യാഥാർത്ഥ്യമാക്കിയത്. ഭൂമിയുടെ താഴ്ന്ന ഭ്രമണപഥത്തിലാകും ഇത് നിരീക്ഷണ വലയം തീർക്കുന്നത്. 50 കിലോയിൽ താഴെ മാത്രമാണ് ഇതിന്റെ ഭാരം. ഉയർന്ന മികവുറ്റ ഒപ്റ്റിക്കൽ സാറ്റ്ലൈറ്റ് ചിത്രങ്ങൾ നൽകാൻ ഇതിന് സാധിക്കും. ഭാവിയിൽ ടിസാറ്റ്-1 ഇന്ത്യൻ സായുധ സേനയുടെ ഭാഗമാകുമെന്നാണ് പ്രതീക്ഷ.
This is a first step. TASL’s TSAT-1A has been successfully launched and deployed.@satellogic https://t.co/tTP1aajh8u
— Tata Advanced Systems (Tata Aerospace & Defence) (@tataadvanced) April 8, 2024
ബഹിരാകാശ മേഖലയോടുള്ള ടിഎഎസ്എല്ലിൻറെ പ്രതിബദ്ധതയാണ് ഈ സുപ്രധാന നാഴികക്കല്ലിലൂടെ വെളിവാകുന്നതെന്ന് ടിഎഎസ്എൽ സിഇഒ സുകരൻ സിംഗ് പറഞ്ഞു. സാറ്റലോജിക്കുമായുള്ള പങ്കാളിത്തമാണ് ഇതിന് പ്രാപ്തമാക്കിയത്. കേന്ദ്ര സർക്കാരിൽ നിന്ന് ലഭിച്ച പിന്തുണയ്ക്ക് നന്ദി അറിയിക്കുന്നതായും അദ്ദേഹം കൂട്ടിച്ചേർത്തു.
ടാറ്റ സൺസിന്റെ ഉടമസ്ഥതയിലുള്ള സ്ഥാപനമാണ് ടിഎഎസ്എൽ. ഇന്ത്യയിലെ എയ്റോസ്പേസ് , പ്രതിരോധ മേഖലയിലെ സുപ്രധാന പങ്കാളിയാണ്.
