ലോകത്തിലെ ഏറ്റവും കനം കുറഞ്ഞ വാച്ച് പുറത്തിറക്കുന്ന കമ്പനിയെന്ന് നേട്ടം വീണ്ടെടുത്ത് പ്രമുഖ റോമൻ ആഭരണ നിർമ്മാതാക്കളായ ബൾഗാരി. ഒക്ടോ ഫിനിസിമോ അൾട്രാ (Octo Finissimo Ultra) എന്ന പേരിലാണ് വാച്ച് വിപണിയിൽ അവതരിപ്പിച്ചത്. സ്വിസ് ആഡംബര വാച്ച് കമ്പനിയായ റിച്ചാർഡ് മില്ലെയുടെ റെക്കോർഡ് തകർത്താണ് ബൾഗാരി വീണ്ടും റെക്കോർഡ് സ്വന്തമാക്കിയത്.
നേരത്തെയും ലോകത്തിലെ ഏറ്റവും കനം കുറഞ്ഞ വാച്ച് നിർമ്മാതാക്കളെന്ന വിശേഷണം ബൾഗാരിയുടെ പേരിൽ തന്നെയായിരുന്നു. 1.8 മില്ലിമീറ്റർ കനത്തിലായിരുന്നു അന്ന് ഒക്ടോ ഫിനിമിസോ അൾട്ര പുറത്തിറക്കിയത്. എന്നാൽ വാച്ച് വിപണിയിൽ അവതരിപ്പിച്ച് വെറും നാല് മാസത്തിനുള്ളിൽ റിച്ചാർഡ് മില്ലെ RM UP-01 ഫെരാരി എന്ന പേരിൽ ബൾഗരിയുടെ വാച്ചുമായി 0.05 എംഎം കനത്തിന്റെ വ്യത്യാസത്തിൽ വാച്ച് അവതരിപ്പിച്ചു. 1.75 മില്ലിമീറ്ററായിരുന്നു ഇതിന്റെ കനം.
ആഡംബര വാച്ച് വിപണിയിൽ വമ്പൻ മാറ്റങ്ങൾക്കാണ് ഇത് വഴിയൊരുക്കിയത്. കനം കുറവിന് പുറമേ, ഡയലിനുള്ളിൽ ഉൾപ്പെടുത്തിയ ക്യുആർ കോഡ് പോലുള്ള ആധുനിക സംവിധാനങ്ങൾ ഈ ബൾഗാരിയുടെ കുഞ്ഞൻ വാച്ചിലുണ്ടായിരുന്നു. എന്നാൽ മെല്ലെ മെല്ലെ ഫെരാരി-റിച്ചാർഡ് മില്ലെ വിപണി കീഴടക്കുകയായിരുന്നു.
ഇതിന് പിന്നാലെയാണ് ബൾഗാരി ഫെരാരി റിച്ചാർഡിനെ മറികടക്കുന്ന കുഞ്ഞൻ വാച്ചുമായി വിപണിയിലെത്തിയിരിക്കുന്നത്. അവരുടെ വാച്ചിന്റെ കനത്തിനേക്കാൾ 0.05 മില്ലിമീറ്റർ കനം കൂടി കുറച്ച്, 1.7 മില്ലിമീറ്റർ കനത്തിലാണ് ബൾഗാരി രണ്ടാമത്തെ വാച്ച് നിർമ്മിച്ചത്.
ഏറ്റവും കനം കുറഞ്ഞ ക്രോണോമീറ്റർ സാക്ഷ്യപ്പെടുത്തിയ ടൈംപീസ് എന്ന ബഹുമതിയും ഇതിന് സ്വന്തമാണ്. ചലനം, താപനില, ഈർപ്പം, വായു മർദ്ദം എന്നിവയുടെ വ്യത്യാസങ്ങൾക്കിടയിലും സമയം കൃത്യമായി അളക്കുന്നതിനുള്ള ഉപകരണമാണ് ക്രോണോമീറ്റർ. 20 വാച്ചുകൾ മാത്രമാണ് കമ്പനി പുറത്തിറക്കിയത്. 5,29,000 ഡോളറാണ് വാച്ചിന്റെ വില. ഇന്ത്യയിൽ ഇതിന് ഏകദേശം 4,40,30,680 രൂപ വരും.
