ഓൺലൈൻ ടാക്സി സേവനമായ ഒല ക്യാബ്സ് വിദേശ രാജ്യങങളിലെ പ്രവർത്തനം അവസാനിപ്പിക്കുന്നു. ഈ മാസം അവസത്തോടെയാണ് പ്രവർത്തനം നിർത്തുന്നത്. നിലവിലെ അന്താരാഷ്ട്ര വിപണികളായ യുകെ, ഓസ്ട്രേലിയ, ന്യൂസിലാൻഡ് എന്നിവിടങ്ങളിൽ ഇനിമുതൽ ഒല ക്യാബിന്റെ സേവനം ലഭിക്കില്ല. ഇന്ത്യയിൽ ശ്രദ്ധകേന്ദ്രീകരിക്കുന്നതിന് വേണ്ടിയാണ് തങ്ങൾ ശ്രമിക്കുന്നതെന്നും ഒല കമ്പനി അറിയിച്ചു.
ഏപ്രിൽ 12-നാണ് ഓസ്ട്രേലിയയിൽ ഒലയുടെ പ്രവർത്തനം അവസാനിപ്പിക്കുന്നത്. ഇതിനെക്കുറിച്ചുള്ള അറിയിപ്പുകൾ ഓസ്ട്രേലിയയിലെ ഒല ക്യാബിന്റെ ജീവനക്കാർക്കും ഉപഭോക്താക്കൾക്കും ഇതിനോടകം ലഭിച്ചു കഴിഞ്ഞു. രാജ്യത്ത് ഒലയുടെ സേവനങ്ങൾ അടച്ചുപൂട്ടുന്നതായി ഓസ്ട്രേലിയൻ മാദ്ധ്യമങ്ങളും നേരത്തെ റിപ്പോർട്ട് ചെയ്തിരുന്നു.
ഇന്ത്യയിൽ ഒല ക്യാബിന്റെ സാധ്യതകൾ മുന്നിൽ കണ്ട് പ്രവർത്തനം വിപുലീകരിക്കുകയാണ് ലക്ഷ്യമെന്ന് കമ്പനി വക്താവ് പറഞ്ഞു. കമ്പനിയുടെ മുൻഗണനകളും ലക്ഷ്യങ്ങളും പുനരവലോകനം ചെയ്തിൽ നിന്നാണ് വിദേശ ഓപ്പറേഷനുകൾ അവസാനിപ്പിക്കാനും ഇന്ത്യയിലേക്ക് കൂടുതൽ ശ്രദ്ധ കേന്ദ്രീകരിക്കാനും തീരുമാനിച്ചതെന്ന് വക്താവ് കൂട്ടിച്ചേർത്തു.
ബൈക്ക്-ടാക്സി സേവനങ്ങൾ നൽകുന്നതിനായി പൊതുവിപണിയിലെ സഹോദര സ്ഥാപനമായ ഓല ഇലക്ട്രിക്കിൽ നിന്ന് 8,000 ഇലക്ട്രിക് സ്കൂട്ടറുകൾ കമ്പനി ഇതിനകം വാങ്ങിയിട്ടുണ്ടെന്ന് ഒല കാബ്സിന്റെ ചീഫ് എക്സിക്യൂട്ടീവ് ഹേമന്ത് ബക്ഷി പറഞ്ഞു.