തെന്നിന്ത്യൻ സിനിമാ പ്രേക്ഷകർ വർഷങ്ങളായി കാത്തിരിക്കുന്ന ഗൗതം മേനോൻ ചിത്രമാണ് ധ്രുവനച്ചത്തിരം. സിനിമയുടെ റിലീസ് പല തവണയായി മാറ്റി വച്ചിരുന്നു. റിലീസ് തിയതി പ്രഖ്യാപിക്കുമെങ്കിലും ദിവസങ്ങൾക്കുള്ളിൽ തിയതി മാറ്റുകയും ചെയ്യും. സിനിമയുടെ റിലീസ് വൈകുന്നതിൽ തനിക്കും കടുത്ത നിരാശയുണ്ടെന്ന് അറിയിച്ചിരിക്കുകയാണ് ധ്രുവനച്ചത്തിരത്തിലെ നായിക ഋതു വർമ്മ.
‘ധ്രുവനച്ചത്തിരത്തിന്റെ റിലീസ് തുടർച്ചയായി മാറ്റുന്നത് മാനസികമായി നിരാശപ്പെടുത്തുന്നു. ഇത് നല്ലൊരു ചിത്രമാണ്. ഗൗതം സാറിന്റെ സംവിധാനം ഒരിക്കൽ കൂടി കാണാൻ പ്രേക്ഷകരെ പോലെ ഞാനും ആഗ്രഹിക്കുന്നുണ്ട്. ഗൗതം വാസുദേവിന്റെ ചിത്രത്തിൽ അഭിനയിക്കുക എന്നത് എന്റെയൊരു സ്വപ്നമായിരുന്നു.’- ഋതു വർമ്മ പറഞ്ഞത്.
എട്ട് വർഷം മുമ്പാണ് ധ്രുവനച്ചത്തിരത്തിന്റെ ചിത്രീകരണം ആരംഭിച്ചത്. എന്നാൽ പലതവണ റിലീസ് പ്രഖ്യാപിച്ചെങ്കിലും പിന്നീട് മാറ്റുകയായിരുന്നു.
ചിത്രം മാർച്ച് 28ന് റിലീസ് ചെയ്യുമെന്നായിരുന്നു അവസാനം പുറത്തു വന്ന വിവരം. എന്നാൽ, പിന്നെയും നീട്ടി. പുതിക്കിയ തിയതി ഇതുവരെയും പുറത്ത് വന്നിട്ടില്ല. സാമ്പത്തിക പ്രശ്നങ്ങളാൽ റിലീസ് തീയതി മാറ്റിവെക്കുകയാണെന്നാണ് അന്ന് ഗൗതം മേനോൻ അറിയിച്ചത്.
വിക്രം പ്രധാന വേഷത്തിലെത്തുന്ന ചിത്രത്തിൽ വിനായകനാണ് പ്രതിനായകൻ. 2016-ൽ ആണ് ചിത്രീകരണം ആരംഭിക്കുന്നത്. സാമ്പത്തിക പ്രശ്നം മൂലം 2018 മുതൽ ചിത്രീകരണം നിർത്തി വെയ്ക്കുകയായിഡരുന്നു. പല ഘട്ടങ്ങളിലായി ചിത്രീകരണം വീണ്ടും ആരംഭിച്ചു. മൂന്ന് വർഷം മുമ്പ് ചിത്രത്തിലെ ഒരു ഗാനം പുറത്തുവിട്ടു. കഴിഞ്ഞ വർഷം ട്രെയിലറും പങ്കുവച്ചിരുന്നു. ഐശ്വര്യ രാജേഷ്, സിമ്രാൻ, പാർത്ഥിപൻ, ദിവ്യദർശിനി തുടങ്ങിയവരാണ് ചിത്രത്തിൽ പ്രധാന വേഷങ്ങളിൽ എത്തുന്നത്.
