തിരുവനന്തപുരം: കാർഷിക സമൃദ്ധിയുടെ ഓർമ്മകൾ പുതുക്കി ഒരു വിഷുക്കാലം കൂടി. കണ്ണനെ കണി കണ്ടുണർന്നും വിഷു കൈനീട്ടം നൽകിയും നാടെങ്ങും ഇന്ന് വിഷു ആഘോഷിക്കുന്നു. കൃഷ്ണ വിഗ്രഹത്തിന് മുന്നിൽ നിലവിളക്ക് തെളിയിച്ച് ഓട്ടുരുളിയിൽ ഐശ്വര്യത്തിന്റെ കാഴ്ചയായി കൊന്നപ്പൂക്കളും കോടി മുണ്ടും, അഷ്ടമംഗല്യവും, വാൽ കണ്ണാടിയും പിന്നെ സമ്പന്നമായൊരു കാർഷിക സംസ്കാരത്തിന്റെ ഓർമ്മപ്പെടുത്തലും. കണിവെളളരിയും, ചക്കയും, മാങ്ങയും മറ്റ് ഫലങ്ങളും നിറച്ച് ഒരു വിഷുക്കണി. കണി കണ്ടുകഴിഞ്ഞാൽ പിന്നെ വിഷു കൈനീട്ടം. കുടുംബത്തിലെ മുതിർന്നവർ നൽകുന്ന സമ്പൽ സമൃദ്ധിയുടെ നല്ല നാളെകൾക്കായുള്ള തുടക്കമാണ് വിഷു കൈനീട്ടം.
കേരളത്തിന്റെ പ്രധാനപ്പെട്ട രണ്ട് ഉത്സവങ്ങളാണ് വിഷു, ഓണം എന്നിവ. രണ്ടും കാർഷികോത്സവങ്ങൾ തന്നെ. വിളവെടുപ്പിന്റെ സന്തോഷം ആഘോഷിക്കുക കൂടിയാണ് ഇതിലൂടെ. കാർഷിക സമൃദ്ധിയിലേക്കും ഐശ്വര്യത്തിലേക്കും കൺതുറക്കുന്ന പ്രതീക്ഷയുടെ ദിനമാണ് വിഷു. മേടമാസത്തിലെ വിഷുപ്പുലരിയിൽ കാണുന്ന കണിയുടെ പുണ്യവും സൗഭാഗ്യങ്ങളും വർഷം മുഴുവൻ നിലനിൽക്കുമെന്നാണ് വിശ്വാസം. വിഷുവിന് സമാനമായ ആഘോഷങ്ങൾ മറ്റ് സംസ്ഥാനങ്ങളിലുമുണ്ട്.
കൂട്ടായ്മയുടെ ഉത്സവം തന്നെയാണ് ഇന്നും വിഷു. വടക്കൻ കേരളത്തിലാണ് വിഷുവിന്് കൂടുതൽ പ്രാധാന്യം. പടക്കംപൊട്ടിച്ചും വിഷുക്കോടികൾ കൈമാറിയും വീടുകളിൽ ബന്ധുമിത്രാതികളെല്ലാവരും ഒത്തുകൂടിയുമുള്ള ഒരു ആഘോഷം. കണികാണൽ കഴിഞ്ഞാൽ രാവിലെ പടക്കങ്ങൾ പൊട്ടിച്ച് വിഷു ആഘോഷങ്ങൾ ആരംഭിക്കുകയായി. അതിരാവിലെ ക്ഷേത്ര ദർശനവും പ്രധാനമാണ്. കേരളത്തിലെ മിക്ക ക്ഷേത്രങ്ങളിലും വിഷു നാളിൽ സമൃദ്ധമായൊരു കണി ഭക്തർക്കായി ഒരുക്കിയിരിക്കും ഒപ്പം കൈനീട്ടവും ഉണ്ടാകും. പിന്നാലെ വീടുകളിൽ വിഷുക്കളികളും സദ്യവട്ടവും എല്ലാമായി ഒരു ദിനം…
കൃഷ്ണവിഗ്രഹവും കണിക്കൊന്നയും കളിവെള്ളരിയും വാൽക്കണ്ണാടിയും ഗ്രന്ഥക്കെട്ടും പഴങ്ങളും പൊന്നും കോടിമുണ്ടും നാളികേരവുമെല്ലാമായി ഒരുക്കിയ വിഷുക്കണി കണ്ട് ഐശ്വര്യത്തിന്റെ നല്ല നാളുകളിലേക്ക് ശുഭപ്രതീക്ഷയോടെ കാൽവെയ്ക്കുന്ന എല്ലാ മലയാളികൾക്കും ജനം ടി വി യുടെ വിഷു ആശംസകൾ…
