മുംബൈ: രാമനവമി ദിന ആശംസകൾ നേർന്ന് നടിയും എൻഡിഎ ലോക്സഭ സ്ഥാനാർത്ഥിയുമായ കങ്കണ റണാവത്ത്. സമൂഹമാദ്ധ്യമങ്ങളിലൂടെയാണ് താരം ആശംസകൾ അറിയിച്ചത്. പ്രാണപ്രതിഷ്ഠാ ചടങ്ങിലെ അവിസ്മരണീയ നിമിഷങ്ങൾ ഉൾക്കൊള്ളിച്ചുകൊണ്ടുള്ള ഒരു വീഡിയോയും കങ്കണ പങ്കുവച്ചു.
‘500 വർഷങ്ങൾക്ക് ശേഷം ഭഗവാൻ ശ്രീരാമൻ തന്റെ ഭവ്യമന്ദിരത്തിൽ ആദ്യമായി രാമനവമി ആഘോഷിക്കുന്ന ശുഭ മുഹൂർത്തം.’ എന്ന കുറിപ്പോടെയായിരുന്നു കങ്കണ വീഡിയോ പങ്കുവച്ചത്. പ്രാണപ്രതിഷ്ഠാ ദിനത്തിൽ രാമക്ഷേത്രത്തിന് മുന്നിൽ നിന്ന് താരം ജയ് ശ്രീറാം മന്ത്രം ഉച്ചത്തിൽ ഉരുവിടുന്നതും വീഡിയോയിൽ കാണാം. ഒപ്പം സർവ്വാഭരണ വിഭൂഷിതനായ രാംലല്ലയെയും വീഡിയോയിൽ കാണാം.
View this post on Instagram
പ്രാണപ്രതിഷ്ഠാ ദിനത്തിൽ രാമക്ഷേത്രത്തിൽ നിറകണ്ണുകളോടെ നിൽക്കുന്ന ഭക്തരും, പ്രാണപ്രതിഷ്ഠാ പൂജകളിൽ പങ്കെടുക്കുന്ന പ്രധാനമന്ത്രിയുടെ ദൃശ്യങ്ങളും വീഡിയോയിലുണ്ട്. സമൂഹമാദ്ധ്യമമായ ഇൻസ്റ്റഗ്രാമിലൂടെയാണ് കങ്കണ വീഡിയോ പങ്കുവച്ചത്.
മറ്റൊരു ചരിത്ര നിമിഷത്തിന് കൂടിയായിരുന്നു അയോദ്ധ്യ ഇന്ന് സാക്ഷ്യം വഹിച്ചത്. പതിനായിരക്കണക്കിന് വിശ്വാസികളാണ് ഈ അത്യപൂർവ ദർശനത്തിനായി ക്ഷേത്രത്തിലെത്തിയത്. ഏകദേശം നാല് മിനിറ്റോളം സൂര്യാഭിഷേകം നടന്നു. കൃത്യം 12.15 മുതൽ 12.19 വരെയാണ് സൂര്യതിലകം രാമവിഗ്രഹത്തിൽ പതിഞ്ഞത്. ഏഴര സെന്റീ മീറ്റർ നീളത്തിലാണ് സൂര്യ കിരണങ്ങൾ രാംലല്ലയുടെ നെറ്റിയിൽ പതിച്ചത്.
