അന്റാർട്ടിക്കയിൽ പുതിയ പ്രതിഭാസം കണ്ടെത്തി ശാസ്ത്രലോകം. പ്രസിദ്ധമായ റോസ് ഐസ് ഷെൽഫ് മുന്നോട്ട് കുതിക്കുകയാണെന്നാണ് ഗവേഷകരുടെ കണ്ടെത്തൽ. അന്റാർട്ടിക്കയിലെ ഏറ്റവും വലിയ ഐസ് ഷെൽഫാണ് റോസ്. ലംബമായി നിൽക്കുന്ന ഈ ഐസ് ഷെൽഫിന് 600 കിലോ മീറ്റർ നീളവും ജലനിരപ്പിൽ നിന്ന് 50 മീറ്ററോളം ഉയരവുമുണ്ട്. ഒഴുകുന്നതിനാൽ ഫ്ലോട്ടിംഗ് ഐസ് എന്നാണ് ഇത് അറിയപ്പെടുന്നത്. റോസ് ഐസ് ഷെൽഫിന്റെ 90 ശതമാനം ഭാഗവും ജലോപരിതലത്തിന് അടിയിലാണ്.
അന്റാർട്ടിക്കയിലെ പ്രസിദ്ധമായ ഈ ഐസ് ഷെൽഫിന് ഏകദേശം ഫ്രാൻസിന്റെ വലിപ്പം വരും. പുതിയ കണ്ടെത്തൽ പ്രകാരം ഈ ഭീമൻ ഐസ് ദിവസവും ഒന്നോ രണ്ടോ തവണ മുന്നോട്ട് കുതിക്കുകയാണ്. കാലാവസ്ഥാ വ്യതിയാനം നേരിടുന്നതിനാൽ റോസ് ഐസ് ഷെൽഫിന്റെ ആയുസിനെ പോലും ചോദ്യം ചെയ്യുന്ന കണ്ടെത്തലാണിതെന്ന് വിലയിരുത്തുന്നു. മുന്നോട്ടുള്ള കുതിപ്പ് ഐസ്ക്വേക്കിന് കാരണമായേക്കുമെന്നും വിദഗ്ധർ അഭിപ്രായപ്പെടുന്നുണ്ട്. ജിയോഗ്രഫിക്കൽ റിസർച്ച് ലെറ്റേഴ്സിലാണ് പുതിയ ഗവേഷക റിപ്പോർട്ട് പ്രസിദ്ധീകരിച്ചിരിക്കുന്നത്.
