പ്രേക്ഷകരുടെ പ്രിയ താരജോഡികളാണ് സൂര്യയും ജ്യോതികയും. വിവാഹ ശേഷം സിനിമയിൽ നിന്ന് ഇടവേള എടുത്ത ജ്യോതിക വീണ്ടും സിനിമയിൽ സജീവമാണ്. വീണ്ടും അഭിനയരംഗത്ത് എത്തിയപ്പോൾ മുതൽ ആരാധകരുടെ ഇടയിൽ നിറഞ്ഞ ചോദ്യമാണ് സൂര്യയും ജ്യോതികയും വീണ്ടും ഒരുമിക്കുന്നത് എപ്പോഴാണെന്ന്. പുറത്തുവരുന്ന വാർത്തകൾ അനുസരിച്ച് ഇരുവരും ഒന്നിക്കുന്ന ചിത്രം ഉടൻ പ്രതീക്ഷിക്കാം.
സൂര്യയും ജ്യോതികയും ഒന്നിക്കുന്ന ചിത്രം യാഥാർത്ഥ്യമാക്കുന്നത് മലയാളി സംവിധായിക അഞ്ജലി മേനോൻ ആണ്. അഞ്ജലി സംവിധാനം ചെയ്യുന്ന ഏറ്റവും പുതിയ ചിത്രത്തിൽ ഇരുവരും ഒന്നിക്കുമെന്ന് തമിഴ് സിനിമാ മാദ്ധ്യമങ്ങൾ റിപ്പോർട്ട് ചെയ്യുന്നു. അതേസമയം ഹലിത ഷമീം സംവിധാനം ചെയ്യുന്ന ചിത്രത്തിലേക്കും ഇരുവരെയും സമീപിച്ചതായും വാർത്തകളുണ്ട്. എന്നാൽ ഇക്കാര്യത്തിൽ ഔദ്യോഗിക പ്രഖ്യാപനം നടന്നിട്ടില്ല.
അഭിനയ രംഗത്ത് സജീവമാണെങ്കിലും ഡേറ്റ് ക്ലാഷുകൾ ഉണ്ടാകാത്ത രീതിയിലാണ് ജ്യോതിക സിനിമകൾ തിരഞ്ഞെടുക്കുന്നത്. സൂര്യയുടെതായി നിരവധി ചിത്രങ്ങളാണ് അണിയറയിൽ ഒരുങ്ങുന്നത്. കങ്കുവയാണ് സൂര്യയുടെ റിലീസിനൊരുങ്ങുന്ന ചിത്രം. സുധ കൊങ്ങാര സംവിധാനം ചെയ്യുന്ന പുറനാനൂറ്, കാർത്തിക് സുബ്ബരാജ് ചിത്രം എന്നിവയാണ് സൂര്യയുടെതായി അണിയറിയിൽ ഒരുങ്ങുന്ന മറ്റ് ചിത്രങ്ങൾ.
