ബിജെപി ദേശീയ പ്രകടന പത്രിക മാനന്തവാടി ബിഷപ്പിന് കൈമാറി പ്രകാശനം ചെയ്ത് വയനാട് എൻഡിഎ സ്ഥാനാർത്ഥി കെ. സുരേന്ദ്രൻ. മോദിയുടെ ഗ്യാരണ്ടി എന്ന തലക്കെട്ടിലുള്ള പ്രകടന പത്രികയുടെ മലയാളം പതിപ്പാണ് ബിഷപ്പ് മാർ ജോസ് പൊരുന്നേടം പിതാവിന് നൽകി പ്രകാശനം ചെയ്തത്.
ദരിദ്രരുടെയും യുവാക്കളുടെയും കർഷകരുടെയും ഉന്നമനത്തിൽ ശ്രദ്ധ കേന്ദ്രീകരിക്കുന്ന പ്രകടന പത്രികയാണ് ബിജെപി പുറത്തിറക്കിയിരിക്കുന്നത്. സ്ത്രീശക്തി, യുവശക്തി, കർഷകർ, പാവപ്പെട്ടവർ എന്നിങ്ങനെ വികസിത് ഭാരതിന്റെ നാല് തൂണുകളിലാണ് പ്രകടനപത്രിക ഊന്നൽ നൽകുന്നതെന്ന് പ്രകടന പത്രിക അവതരിപ്പിച്ചുകൊണ്ട് പ്രധാനമന്ത്രി പറഞ്ഞിരുന്നു.
ഇന്ത്യയെ അന്താരാഷ്ട്ര നിർമ്മാണ ഹബ്ബാക്കും, ഇന്ധനവില കുറയ്ക്കും, അഴിമതിക്കെതിരെ പോരാട്ടം തുടരും, ഒരു രാജ്യം ഒരു തിരഞ്ഞെടുപ്പ്, രാജ്യത്ത് 6-ജി കണക്ടിവിറ്റി, അന്താരാഷ്ട്ര തലത്തിൽ രാമായണ മഹോത്സവം, രാജ്യത്തെ തെക്കും വടക്കുമായി ബന്ധിപ്പിക്കുന്ന ബുള്ളറ്റ് ട്രെയിൻ, വനിതാ സംവരണ നിയമം നടപ്പാക്കും, മുദ്ര വായ്പ പരിധി 20 ലക്ഷമാക്കും, മെട്രോ റെയിൽ ശൃംഖല വിപുലമാക്കും, അഴിമതിക്കാർക്കെതിരെ കൂടുതൽ കർശന നടപടികൾ സ്വീകരിക്കും, കൂടുതൽ വന്ദേ ഭാരത് ട്രെയിനുകൾ തുടങ്ങിയവയും പ്രഖ്യാപനത്തിലുണ്ട്.
70 കഴിഞ്ഞാൽ അഞ്ച് ലക്ഷം രൂപ വരെ സൗജന്യ ചികിത്സ, പ്രായമായവരെ ആയുഷ്മാൻ പദ്ധതിയിൽ ഉൾപ്പെടുത്തും. ഭിന്നശേഷിക്കാർക്ക് പി.എം. ആവാസ് യോജന വഴി വീടുകൾ നൽകും, പുതിയ ക്രിമിനൽ നിയമം, പെട്രോളിയം ഉൽപ്പന്നങ്ങളുടെ നികുതി കുറക്കും, വൈദ്യുതി ബിൽ പൂജ്യമാക്കും തുടങ്ങി നിരവധി കാര്യങ്ങളാണ് പത്രികയിൽ പറയുന്നത്.
