ഇത് ഇത്തിരി വെറൈറ്റിയാണേ! വ്യത്യസ്തയാർന്ന ഇന്ത്യയുടെ ചില പോസ്റ്റോഫീസുകളെ പരിചയപ്പെടാം, ഒപ്പം അൽപ്പം കൗതുകകരമായ വിശേഷങ്ങളും

പോസ്റ്റോ‌ഫീസുകൾ ലോകത്ത് സാധാരണമാണ്. ഒരുകാലത്ത് ആശയവിനിമയത്തിന്റെ പ്രധാന മാദ്ധ്യമമായിരുന്നു തപാൽ. ആധുനിക സംവിധാനങ്ങൾ കയ്യടക്കുന്ന ഇക്കാലത്തും താപാൽ ഓഫീസുകളും തപാലും പ്രവർത്തക്ഷമമാണ്. എന്നാൽ ഇന്ത്യയിലെ അസാധാരണമായ ചില പോസ്റ്റോഫീസുകളെ പരിചയപ്പെട്ടാലോ..

ഹിക്കിമിലെ പോസ്റ്റോഫീസ്

ഹിമാചൽ‌ പ്രദേശിൽ, സമുദ്ര നിരപ്പിൽ നിന്ന് 15,500 അടി ഉയരത്തിലാണ് ഹിക്കിം പോസ്റ്റോഫീസ് സ്ഥിതി ചെയ്യുന്നത്. ലോകത്തിലെ തന്നെ ഏറ്റവും ഉയരത്തിൽ സ്ഥിതി ചെയ്യുന്ന പോസ്റ്റോഫീസാണ് ഇത്. കാസ പട്ടണത്തിൽ നിന്ന് 23 കിലോമീറ്റർ അകലെയാണ് ഇത് സ്ഥിതി ചെയ്യുന്നത്.

ചെറിയൊരു കുടിലിന് സമാനമാണ് ഹിക്കിം പോസ്റ്റോഫീസ്. വെള്ള പൂശിയ ചുമരുകളും പുറത്ത് തൂങ്ങിക്കിടക്കുന്ന ചുവന്ന തപാൽ പെട്ടിയും തനിമ നിലനിർത്തുന്നു. 1983 നവംബർ അഞ്ചിനാണ് ഹിക്കിം പോസ്റ്റോഫീസ് പ്രവർത്തനം ആരംഭിച്ചത്. ഇൻ്റർനെറ്റ്, സെൽ ഫോൺ സിഗ്നലുകൾ ലഭ്യമല്ലാത്ത ഹിക്കിം നിവാസികളെ പുറംലോകവുമായി ബന്ധിപ്പിക്കുന്ന ഏക സംവിധാനമാണ് ഈ പോസ്റ്റോഫീസ്.

20 വർഷത്തിലേറെയായി ബ്രാഞ്ച് പോസ്റ്റ്‌മാസ്റ്ററായ റിഞ്ചൻ ചെറിം​ഗിനാണ് ഇതിന്റെ നിയന്ത്രണം. വേ​ഗത്തിൽ ഓടാനും സൈക്കിൾ ചവിട്ടാനും അറിയുന്ന അദ്ദേഹം 22-ാം വയസിലാണ് പോസ്റ്റോഫീസ് നിയന്ത്രിക്കാനെത്തുിയത്. ശൈത്യകാലത്ത് മഞ്ഞുമൂടുന്നതിനാൽ ആറ് മാസം കാലം പോസ്റ്റോഫീസ് അടച്ചുപൂട്ടും.

അന്റാർട്ടിക്കയിലെ പോസ്റ്റോഫീസ്

മഞ്ഞുമൂടിയ ഭൂഖണ്ഡമായ അന്റാർട്ടിക്കയിൽ ഭാരതത്തിന് മൂന്ന് തപാൽ ഓഫീസുകളാണ് ഉള്ളത്. അന്റാർട്ടിക്കയിലെ ഇന്ത്യയുടെ ആദ്യത്തെ ശാസ്ത്ര കേന്ദ്രമായ ദക്ഷിണ ഗംഗോത്രി സ്റ്റേഷനിലാണ് ഒരു തപാൽ ഓഫീസ് പ്രവർത്തിക്കുന്നത്. 1984 ഫെബ്രുവരി 24-നാണ് പ്രവർത്തനമാരംഭിച്ചത്. 1987-ൽ ഏഴാമത്തെ ഇന്ത്യൻ സയൻ്റിഫിക് എക്സ്പെഡിഷനിൽ അംഗമായി അൻ്റാർട്ടിക്കയിലേക്ക് പോയ ശാസ്ത്രജ്ഞൻ ജി. സുധാകർ റാവു അതിന്റെ ആദ്യത്തെ ഓണററി പോസ്റ്റ്മാസ്റ്ററായി നിയമിതനായി.

1990-ൽ അൻ്റാർട്ടിക്കയിലെ ദക്ഷിണ ഗംഗോത്രി പോസ്റ്റോഫീസ് മഞ്ഞുമൂടിയതിനെത്തുടർന്ന് ഡീകമ്മീഷൻ ചെയ്തു. തുടർന്ന് പോസ്റ്റ് ഓഫീസ് പുതിയ സ്ഥിരം ഗവേഷണ കേന്ദ്രമായ മൈത്രിയിലേക്ക് മാറ്റി. അടുത്തിടെ ഭാരതി സ്റ്റേഷനിൽ ഇന്ത്യ മൂന്നാമത്തെ തപാൽ ഓഫീസ് ആരംഭിച്ചു.

ദാൽ തടാകത്തിലെ പോസ്റ്റോഫീസ്

ബോട്ടിലൊരു തപാൽ ഓഫീസ് ആയാലോ..? അതെ ശ്രീന​ഗറിലെ ദാൽ തടാകത്തിലാണ് ഫ്ലോട്ടിം​ഗ് പോസ്റ്റോഫീസ് സ്ഥിതി ചെയ്യുന്നത്. കൊളോണിയൽ കാലം മുതൽ നിലനിൽക്കുന്ന പൈതൃക തപാൽ ഓഫീസ്, 2011-ൽ അന്നത്തെ ചീഫ് പോസ്റ്റ്മാസ്റ്റർ ജോൺ സാമുവൽ പുനർനാമകരണം ചെയ്യുന്നതിന് മുമ്പ് നെഹ്‌റു പാർക്ക് പോസ്റ്റ് ഓഫീസ് എന്നാണ് അറിയപ്പെട്ടിരുന്നത്. തപാൽ മുദ്രകൾ പ്രദർശിപ്പിക്കുന്ന മ്യൂസിയവും ഇതിനൊപ്പമുണ്ട്. നിരവധി സഞ്ചാരികളാണ് ഇവിടം സന്ദർശിക്കാനായെത്തുന്നത്.