ദിലീപിനെ കേന്ദ്ര കഥാപാത്രമാക്കി നടനും സംവിധായകനുമായി വിനീത് കുമാർ സംവിധാനം ചെയ്ത ചിത്രമാണ് പവി കെയർടേക്കർ. ഇന്നലെ തിയേറ്ററിലെത്തിയ ചിത്രത്തിന് മികച്ച പ്രതികരണങ്ങളാണ് ലഭിക്കുന്നത്. ജനപ്രിയ നായകന്റെ ചിത്രം മലയാളികൾ എക്കാലവും പ്രതീക്ഷയോടെയാണ് കാത്തിരിക്കുന്നത്. ചിത്രത്തിന്റെ കളക്ഷൻ റിപ്പോർട്ട് പുറത്തുവിട്ടിരിക്കുകയാണ് അണിയറപ്രവർത്തകർ. കേരളത്തിൽ നിന്ന് മാത്രം 3.5 കോടിയാണ് ചിത്രം ഇതുവരെ നേടിയത്.
മുഴുനീള കോമഡി എന്റർടെയ്ൻമെന്റ് ചിത്രമാണ് പവി കേയർടെക്കർ. ജോണി ആന്റണി, രാധിക ശരത്കുമാർ, ധർമജൻ ബോൾഗാട്ടി എന്നിവരും ചിത്രത്തിൽ പ്രധാന കഥാപാത്രങ്ങളായി എത്തുന്നുണ്ട്. ദിലീപിനൊപ്പം അഞ്ച് പുതുമുഖ നായികമാരാണ് ചിത്രത്തിൽ അണിനിരക്കുന്നത്. ഗ്രാൻഡ് പ്രൊഡക്ഷൻസിന്റെ ബാനറിൽ ദിലീപ് തന്നെയാണ് ചിത്രം നിർമിക്കുന്നത്.
ജൂഹി ജയകുമാർ, ശ്രേയ രുഗ്മിണി, റോസ്മിൻ, സ്വാതി, ദിലിന രാമകൃഷ്ണൻ എന്നിവരാണ് ചിത്രത്തിലെ പുതുമുഖ നായികമാർ. രാജേഷ് രാഘവനാണ് തിരക്കഥ ഒരുക്കിയത്. പഴയ ദിലീപ് ചിത്രങ്ങളുടെ ഒരു തിരിഞ്ഞുനോട്ടമാണ് ചിത്രമെന്ന് ആരാധകർ പറയുന്നു. കേയർ ടേക്കറായാണ് ദിലീപ് ചിത്രത്തിലെത്തുന്നത്. ഒരു ഫ്ലാറ്റിലെ കെയർ ടേക്കറിന്റെ ജീവിതത്തിലെ സംഭവ ബഹുലമായ നിമിഷങ്ങളാണ് ചിത്രം പറയുന്നത്.
