തൃശൂർ: മമ്മിയൂരിൽ ലഹരി മാഫിയാ സംഘത്തിന്റെ ആക്രമണത്തിൽ മൂന്ന് പേർക്ക് പരിക്ക്. ഇന്നലെ വൈകിട്ട് സൗപർണികാ അപ്പാർട്ട്മെന്റിൽ വച്ചായിരുന്നു ആക്രമണം. സംഭവത്തിൽ ഫ്ളാറ്റിന്റെ കെയർ ടേക്കർ ഉൾപ്പെടെയുള്ളവർക്ക് പരിക്കേറ്റു. ചാലിശ്ശേരി സദേശി അനുമോദ്, ശുചീകരണ തൊഴിലാളിയും ബംഗാൾ സ്വദേശിയുമായ മഹേഷ്, ഗുരുവായൂർ സ്വദേശി പ്രവീൺ എന്നിവർക്കാണ് ആക്രമണത്തിൽ പരിക്കേറ്റത്.
മുറിയിലിരുന്ന് ലഹരി ഉപയോഗിച്ചത് ചോദ്യം ചെയ്തതിനെ തുടർന്നാണ് സംഘം ആക്രമിച്ചതെന്ന് പൊലീസ് പറഞ്ഞു. ലഹരി ഉപയോഗിക്കരുതെന്നും മുറി ഒഴിയണമെന്നും കെയർ ടേക്കർ ആവശ്യപ്പെട്ടിരുന്നു. ഇതിന്റെ പ്രകോപനത്തിൽ പത്തംഗ സംഘം തൊഴിലാളികളെ വളഞ്ഞിട്ട് ആക്രമിക്കുകയായിരുന്നു.
പരിക്കേറ്റവരെ ആശുപത്രിയിൽ പ്രവേശിപ്പിച്ചു. ആക്രമണ ശേഷം രക്ഷപ്പെട്ട പ്രതികൾക്കായുള്ള അന്വേഷണം ആരംഭിച്ചതായി പൊലീസ് അറിയിച്ചു.