ന്യൂഡൽഹി: ജൂലൈയിൽ പരീക്ഷണ ഓട്ടം നടക്കാനിരിക്കുന്ന വന്ദേ മെട്രോ ട്രെയിനിന്റെ ഫസ്റ്റ് ലുക്ക് വീഡിയോ പുറത്ത്. പഞ്ചാബിലെ കപൂർത്തലയിൽ നിർമ്മിച്ച ഏതാനും കോച്ചുകളുടെ വീഡിയോയാണ് പുറത്തുവന്നിരിക്കുന്നത്. ധാരാളം ആളുകൾ വന്ദേ മെട്രോ ട്രെയിൻ കാണുന്നതിനും വീഡിയോ എടുക്കുന്നതിനും ഒത്തുകൂടിയിരിക്കുന്നതായും ദൃശ്യങ്ങളിൽ നമുക്ക് കാണാം.
” 100 കിലോമീറ്റർ മുതൽ 250 കിലോമീറ്റർ വരെ സർവീസ് നടത്താൻ കഴിയുന്ന വന്ദേ മെട്രോ ട്രെയിനുകളുടെ പരീക്ഷണ ഓട്ടമാണ് ജൂലൈയിൽ നടക്കുന്നത്. ഇത്തരത്തിൽ 50 ട്രെയിനുകൾ നിർമിക്കും. ക്രമേണ എണ്ണം വർദ്ധിപ്പിക്കാനും സാധിക്കും.”- റെയിൽവേ വൃത്തങ്ങൾ പറഞ്ഞു.
നിലവിൽ 12 കോച്ചുകളുള്ള ട്രെയിനുകളായിരിക്കും ട്രാക്കുകളിലിറങ്ങുക. എന്നാൽ ആവശ്യാനുസരണം ഈ കോച്ചുകളുടെ എണ്ണം വർദ്ധിപ്പിച്ച് ആകെ 16 കോച്ച് എന്നതിലേക്ക് മാറ്റാനും സാധിക്കും.
വന്ദേഭാരത് ട്രെയിനുകളുടെ മിനിപതിപ്പെന്ന പോലയാണ് വന്ദേ മെട്രോ ട്രെയിനുകൾ എത്തുന്നത്. ഹ്രസ്വദൂര സർവീസുകളാണ് ട്രെയിനുകൾ നടത്തുന്നതെങ്കിലും ഇവയ്ക്ക് പാസഞ്ചർ ട്രെയിനുകൾ പോലെ എല്ലാ സ്ഥലത്തും സ്റ്റോപ്പുകളുുണ്ടാവില്ല. വന്ദേ മെട്രോ ട്രെയിനുകൾ ഏകദേശം 124 നഗരങ്ങളെ തമ്മിൽ ബന്ധിപ്പിക്കും.
