തിരുവനന്തപുരം: സംസ്ഥാനത്ത് മേഖല തിരിച്ചുള്ള വൈദ്യുതി നിയന്ത്രണം ഏർപ്പെടുത്തി കെഎസ്ഇബി. പാലക്കാട് ട്രാൻസ്മിഷൻ സർക്കിളിന് കീഴിലുള്ള പ്രദേശങ്ങളിലാണ് നിയന്ത്രണം. രാത്രി ഏഴിനും ഒന്നിനും ഇടയിലുള്ള സമയത്ത് ഇടവിട്ടായിരിക്കും നിയന്ത്രണം. ഇതുസംബന്ധിച്ച് പാലക്കാട് ഡെപ്യൂട്ടി ചീഫ് എൻജിനീയർ സർക്കുലർ പുറത്തിറക്കി. പത്തിരിപ്പാല, ഒറ്റപ്പാലം, ഷൊർണൂർ, ചെർപ്പുളശ്ശേരി തുടങ്ങിയ സബ് സ്റ്റേഷനുകളിൽ നിയന്ത്രണം ഉണ്ടാകാൻ സാധ്യതയുണ്ട്. ഈ സമയത്ത് ഉപഭോഗത്തിൽ നിയന്ത്രണമേർപ്പെടുത്തി സഹകരിക്കണമെന്നും സർക്കുലറിൽ പറയുന്നു.
വൈദ്യുതി ഉപഭോഗം കൂടുന്ന സർക്കിളുകളിൽ മേഖല തിരിച്ചുള്ള നിയന്ത്രണം നടപ്പാക്കാൻ ആവശ്യപ്പെട്ടുള്ള നിർദേശം കെഎസ്ഇബി ചീഫ് എൻജിനീയർമാർക്ക് നൽകിയിട്ടുണ്ട്. ഇതിന്റെ ഭാഗമായാണ് പാലക്കാട് സർക്കുലർ പുറപ്പെടുവിച്ചിരിക്കുന്നത്.
ഉപഭോഗം കൂടുന്ന സാഹചര്യത്തിൽ സംസ്ഥാനത്ത് മറ്റ് മാർഗനിർദേശങ്ങളും കെഎസ്ഇബി ഇറക്കിയിട്ടുണ്ട്. വ്യവസായ-വാണിജ്യ സ്ഥാപനങ്ങൾ രാത്രി പത്തുമണിക്കും രണ്ടുമണിക്കും ഇടയിൽ വൈദ്യുതി ഉപയോഗം കുറയ്ക്കണം എന്നുള്ളതാണ് അതിൽ പ്രധാനം. അലങ്കാരവിളക്കുകളും പരസ്യ ബോർഡുകളും രാത്രി ഒമ്പതുമണിക്ക് ശേഷം അണയ്ക്കണമെന്നും നിർദേശത്തിൽ പറയുന്നു. ഗാർഹിക ഉപയോക്താക്കൾ എസി 26 ഡിഗ്രിക്ക് മുകളിൽ ക്രമീകരിക്കണമെന്നും പറയുന്നു.
