ബിക്കാനീർ: കടുത്ത ഉഷ്ണതരംഗം അനുഭവപ്പെടുന്ന ഉത്തരേന്ത്യയിലെ ചൂടിന്റെ തീവ്രത വെളിവാക്കുന്ന ഒരു വീഡിയോ സോഷ്യൽ മീഡിയയിൽ വൈറലായിരിക്കുകയാണ്. പകൽ താപനില 47 ഡിഗ്രി സെൽഷ്യസ് കവിയുന്ന രാജസ്ഥാനിലെ ബിക്കാനീർ മരുഭൂമിയിൽ നിന്നുള്ള വീഡിയോയാണ് സൈബർ ലോകത്ത് ചർച്ചയായിരിക്കുന്നത്.
48 സെക്കൻഡ് ദൈർഘ്യമുള്ള ഈ വീഡിയോയിൽ മുഖത്ത് തുണിയും സൺഗ്ലാസും തൊപ്പിയും ധരിച്ചിരിക്കുന്ന ഒരു ബിഎസ്എഫ് ജവാൻ ഒരു കൈകൊണ്ട് പപ്പടം ചൂടുള്ള മണലിൽ വയ്ക്കുകയും കുറച്ചു മണൽ ഇട്ടു മൂടുകയും ചെയ്യുന്നു. അദ്ദേഹം മറ്റേ കൈകൊണ്ട് തന്റെ സർവീസ് റൈഫിൾ പിടിച്ചിട്ടുണ്ട്. ഒരല്പ സമയം ക്ഷമയോടെ കാത്തിരുന്ന ശേഷം പപ്പടം പുറത്തെടുക്കുമ്പോൾ അത് വറുത്ത് പാകമായ അവസ്ഥയിലായിരുന്നു. മണലിൽ നന്നായി വറുത്തതാണെന്ന് തെളിയിക്കാൻ വീഡിയോയുടെ അവസാനത്തിൽ അദ്ദേഹം പപ്പടം പൊട്ടിച്ചു കാണിക്കുന്നുണ്ട്. വീഡിയോ എപ്പോൾ, എവിടെയാണ് എടുത്തതെന്ന് വ്യക്തതയില്ലെങ്കിലും ഈ വീഡിയോ ഷൂട്ട് ചെയ്ത ഇടം രാജസ്ഥാനിലെ ബിക്കാനീർ മരുഭൂമി ആണെന്നാണ് ഇത് ആദ്യമായി എക്സിൽ അപ്ലോഡ് ചെയ്ത മെഗ് അപ്ഡേറ്റ്സ് എന്ന പേജ് സൂചിപ്പിക്കുന്നത്.
“രാജസ്ഥാനിലെ ബിക്കാനീറിൽ താപനില 47 ഡിഗ്രി സെൽഷ്യസായി ഉയരുന്നു” എന്ന അടിക്കുറിപ്പോടെയാണ് വീഡിയോ എക്സിൽ പങ്കുവെച്ചിരിക്കുന്നത്. വീഡിയോ ഒരു ദിവസം കൊണ്ടുതന്നെ 9 ലക്ഷത്തിലധികം പേർ കണ്ടു.
“അന്താരാഷ്ട്ര അതിർത്തിയിലെ മണൽ ഒരു ചൂള പോലെ തോന്നുന്നു, പക്ഷേ മാതൃരാജ്യത്തെ സേവിക്കുന്ന നമ്മുടെ സൈനികർ ശക്തമായി നിലകൊള്ളുന്നു” . എന്നും കുറിപ്പിലുണ്ട്.
ഈ വീഡിയോ വൈറലായതിനെത്തുടർന്ന് ആസാം മുഖ്യമന്ത്രി ഹിമന്ത ബിശ്വ ശർമ്മ തന്റെ എക്സിലെ അക്കൗണ്ടിൽ ഈ വീഡിയോ പോസ്റ്റ് ചെയ്യുകയും പ്രതികൂല സാഹചര്യങ്ങളിൽ രാജ്യത്തിന്റെ രക്ഷക്കായി സൈനികർ അനുഭവിക്കുന്ന ത്യാഗത്തെ വാഴ്ത്തുകയും ചെയ്തു.
Seeing this video from the deserts of Rajasthan fills me with immense respect and gratitude for our jawans who keep us safe in such extraordinary conditions.@BSF_India pic.twitter.com/kLfE52tuAa
— Himanta Biswa Sarma (Modi Ka Parivar) (@himantabiswa) May 22, 2024
“രാജസ്ഥാനിലെ മരുഭൂമിയിൽ നിന്നുള്ള ഈ വീഡിയോ കാണുമ്പോൾ, അത്തരം അസാധാരണമായ സാഹചര്യങ്ങളിൽ നമ്മെ സുരക്ഷിതരാക്കുന്ന നമ്മുടെ ജവാൻമാരോടുള്ള അളവറ്റ ബഹുമാനവും നന്ദിയും എന്നിൽ നിറയുന്നു.”എന്ന് അദ്ദേഹം എക്സിൽ കുറിച്ചു
ഉത്തരേന്ത്യയിൽ പല പ്രദേശങ്ങളിലും പകൽ താപനില കുതിച്ചുയരുന്ന സാഹചര്യത്തിൽ ഡൽഹിയിലും രാജസ്ഥാൻ, പഞ്ചാബ്, ഹരിയാന, ഉത്തർപ്രദേശ് എന്നിവയുടെ ചില ഭാഗങ്ങളിലും കാലാവസ്ഥാ വകുപ്പ് (ഐഎംഡി) റെഡ് അലർട്ട് പ്രഖ്യാപിച്ചു. അടുത്ത അഞ്ച് ദിവസങ്ങളിൽ കടുത്ത ഉഷ്ണതരംഗം തുടരുമെന്ന് കാലാവസ്ഥാ വകുപ്പ് പ്രവചിക്കുന്നു.